கம்பளை, நாரன்விட்ட ஆடியக்கடவத்த பிஹில்லதெனிய பிரதேசத்தில் ஒரு வீட்டின் கூரையிலிருந்து விழுந்த தந்தையின் உடலுக்கு அடியில் சிக்கி மூன்று வயது குழந்தை உயிரிழந்த மிகவும் சோகமான சம்பவம் பதிவாகியுள்ளது. இவ்வாறு துரதிர்ஷ்டவசமாக உயிரிழந்தவர் மொஹமட் அயாத் என்ற சிறுவன் ஆவார்.
இந்த விபத்தில் பலத்த காயமடைந்த குழந்தையின் தந்தை மொஹமட் ஸ்டிக்கா சாஜின் அலி தற்போது கம்பளை போதனா வைத்தியசாலையில் அனுமதிக்கப்பட்டு சிகிச்சை பெற்று வருகிறார்.பொலிஸ் விசாரணைகளில் தெரியவந்துள்ளபடி, இந்த தந்தை தனது தாய் வீட்டிற்கு அருகில் வசித்து வருகிறார். முந்தைய நாள் காலையில் தனது மோட்டார் சைக்கிளை கழுவுவதற்குத் தேவையான நீர் குழாயை எடுக்க அவர் தாய் வீட்டிற்குச் சென்றுள்ளார். அந்த நீர் குழாய் வீட்டின் கூரையில் வைக்கப்பட்டிருந்ததால், அதை எடுக்க அவர் ஏணியின் உதவியுடன் மேலே ஏறி கூரையில் இருந்த ஒரு பலகையின் மீது காலை வைத்துள்ளார். அப்போது திடீரென அந்த பலகை உடைந்து கீழே விழுந்துள்ளதுடன், அந்த நேரத்தில் அவருக்குக் கீழே நின்றிருந்த சிறுவனின் உடல் மீது தந்தையின் உடல் விழுந்துள்ளது.
விபத்து நடந்த நேரத்தில் முற்றத்தில் விளையாடிக் கொண்டிருந்த குழந்தை, தந்தை வீட்டிற்குள் செல்வதைப் பார்த்து அவரைப் பின்தொடர்ந்து வந்துள்ளது என சாட்சியங்கள் மூலம் உறுதிப்படுத்தப்பட்டுள்ளது. சற்று பருமனான உடல் கொண்ட தந்தையின் எடையுடன் குப்புற விழுந்த குழந்தையின் மூக்கு மற்றும் வாயிலிருந்து அதிக இரத்தம் வெளியேறியுள்ளது. பின்னர் உடனடியாக செயல்பட்ட பிரதேசவாசிகள் தந்தையையும் குழந்தையையும் முச்சக்கர வண்டியில் கம்பளை போதனா வைத்தியசாலைக்கு கொண்டு சென்ற போதிலும், அதற்குள் குழந்தை உயிரிழந்திருந்ததாக மருத்துவர்கள் உறுதிப்படுத்தினர். இச்சம்பவம் தொடர்பாக கம்பளை திடீர் மரண விசாரணை அதிகாரி நலின் ஏ. மெதிவக்க மற்றும் கம்பளை பொலிஸ் குற்றவியல் தடயவியல் பிரிவின் அதிகாரிகள் இணைந்து மேலதிக விசாரணைகளை மேற்கொண்டதுடன், சடலத்தின் பிரேத பரிசோதனையை கம்பளை போதனா வைத்தியசாலையில் மேற்கொள்ள ஏற்பாடுகள் செய்யப்பட்டிருந்தன.
