ஜனாதிபதி அநுர குமார திசாநாயக்க அவர்கள் நேற்று (12) மாத்தளையில் உள்ள வீர கெப்பெட்டிப்பொல மண்டபத்தில் நடைபெற்ற மாத்தளை மாவட்ட விசேட ஒருங்கிணைப்புக் குழுக் கூட்டத்தில் கலந்துகொண்டு, தனிநபர்களின் தரம், கடந்த காலத்தில் அவர்கள் கொண்டிருந்த அதிகாரம் அல்லது எந்தவொரு கண்ணுக்குத் தெரியாத சக்தியையும் பொருட்படுத்தாமல் அனைவருக்கும் சட்டம் சமமாக அமுல்படுத்தப்படும் என்று வலியுறுத்தினார். பழிவாங்கும், வெறுப்பு அல்லது குரோத மனப்பான்மை இல்லாமல், நீதியின் அடிப்படையில் சட்டம் அமுல்படுத்தப்படும் என்றும், ஒரு விசாரணையில் ஒருவரின் பெயர் குறிப்பிடப்பட்டால், அவரிடமிருந்து வாக்குமூலத்தைப் பதிவுசெய்வது ஒரு சாதாரண செயல்முறையே தவிர, அதை ஒரு பெரிய சமூகப் பேரழிவாக சித்தரிக்கக் கூடாது என்றும் அவர் சுட்டிக்காட்டினார்.
சமீபத்தில் ஏற்பட்ட 'திட்வா' சூறாவளியால் பாதிக்கப்பட்ட மக்களுக்காக கடந்த ஆண்டு சுமார் 80 பில்லியன் ரூபாயும், இந்த ஆண்டு 500 பில்லியன் ரூபாயும் ஒதுக்கப்பட்டுள்ள நிலையில், இது நாட்டின் இயற்கை அனர்த்தங்களுக்காக ஒதுக்கப்பட்ட மிக உயர்ந்த ஒதுக்கீடாகக் கருதப்படுகிறது. அனர்த்தங்களால் பாதிக்கப்படுபவர்கள் பெரும்பாலும் பொருளாதார ரீதியாக குறைந்த, பாதுகாப்பற்ற சூழல்களில் வாழும் மக்கள் என்பதால், அவர்களுக்கு பாதுகாப்பான வீடுகளை வழங்குவதற்கும், பகுதியளவில் சேதமடைந்த வீடுகளை மீளக் கட்டுவதற்கும், அழிக்கப்பட்ட பாலங்கள் மற்றும் வீதிகள் உள்ளிட்ட உட்கட்டமைப்பு வசதிகளை உரிய தரத்திற்கு ஏற்ப மீளக் கட்டியெழுப்புவதற்கும் தேவையான நிதி ஒதுக்கீடுகள் செய்யப்பட்டுள்ளன. அத்துடன், முன்னர் இருந்த முறையை விட அனர்த்தத்தால் பாதிக்கப்பட்டவர்களுக்கு அதிக இழப்பீடு வழங்க அரசாங்கம் தீர்மானித்துள்ளதுடன், இந்த 500 பில்லியன் ரூபாயை இந்த ஆண்டுக்குள் செலவிடுவது இந்த முறை உள்ள முக்கிய சவால் என்று ஜனாதிபதி தெரிவித்தார். சர்வதேச நாணய நிதியத்தின் விரிவான கடன் திட்டத்தின் கீழ் அரசாங்கத்தின் வருடாந்த செலவு மொத்த தேசிய உற்பத்தியில் பதின்மூன்று சதவீதத்திற்கு மட்டுப்படுத்தப்பட்டிருந்தாலும், நிதி முகாமைத்துவச் சட்டத்தின்படி இவ்வாறான அவசர அனர்த்த சூழ்நிலைகளில் அந்த எல்லையை மீறி செயற்படுவதற்கு சட்ட ஏற்பாடுகள் உள்ளதாகவும் அவர் விளக்கமளித்தார்.
கடந்த காலத்தில் எந்தவொரு இலக்கும் இல்லாமல் அரசாங்கப் பணத்தைச் செலவழித்ததும், இடையில் கைவிடப்பட்ட கட்டிடங்கள் போன்ற திட்டங்களும் நாட்டின் பொருளாதார வீழ்ச்சிக்கு முக்கிய காரணங்களாக இருந்ததால், இனிமேல் ஒவ்வொரு திட்டமும் முறையான சாத்தியக்கூறு ஆய்வுக்குப் பின்னரே நடைமுறைப்படுத்தப்படும் என்று ஜனாதிபதி தெரிவித்தார். ஒதுக்கப்பட்ட நிதியானது பிரதேச அரசியல் அதிகாரம் மற்றும் அரச அதிகாரிகளின் தலையீட்டுடன் இலக்கு வைக்கப்பட்ட சமூகத்தின் அபிவிருத்திக்காக பயனுள்ள வகையில் பயன்படுத்தப்பட வேண்டும் என்று அவர் கூறினார். அத்துடன், சட்டம் முறையாக அமுல்படுத்தப்படுவதை அரச அதிகாரிகளை அச்சுறுத்துவதாக சில தரப்பினர் சித்தரித்து சமூக கருத்தை உருவாக்க முயன்றாலும், அரச ஊழியர்கள் சுதந்திரமாகவும் திறமையாகவும் கடமைகளைச் செய்வதற்கு அஞ்சக்கூடாது என்றும், முறைகேடுகளில் ஈடுபடுவதற்கே அஞ்ச வேண்டும் என்றும் அவர் வலியுறுத்தினார். அரசியல் அதிகாரம், செல்வம் அல்லது அரசியல் தொடர்புகள் காரணமாக சட்டத்திலிருந்து தப்பிச் செல்ல எவருக்கும் இடமளிக்கப்படாது என்றும், ஜனாதிபதி முதல் கிராம உத்தியோகத்தர் வரை அனைவரும் சட்டத்திற்கு கட்டுப்பட்டு, சட்டத்திற்கு அஞ்சும் ஒரு புதிய கலாசாரம் நாட்டில் உருவாக்கப்பட வேண்டும் என்றும் அவர் மேலும் தெரிவித்தார். ஏதேனும் ஒரு சந்தர்ப்பத்தில் சட்டம் அநியாயமாக அமுல்படுத்தப்பட்டால், அதற்கு எதிராகச் செயற்படுவதற்கு சட்டத்திலேயே ஏற்பாடுகள் உள்ளதாகவும் அவர் சுட்டிக்காட்டினார்.
தங்களைச் சட்டத்திற்கு அப்பாற்பட்டவர்கள் என்று கருதி செயற்பட்ட சில குழுக்களால் தற்போது சட்டம் அமுல்படுத்தப்படுவதை தாங்கிக்கொள்ள முடியவில்லை என்றும், கடந்த காலத்தில் இந்நாட்டின் ஜனாதிபதிகள் கூட அரசியலமைப்பை மீறி சட்டத்தை மீறியுள்ளதாக உச்ச நீதிமன்றம் தீர்ப்பளித்துள்ளதாகவும் ஜனாதிபதி இங்கு நினைவுகூர்ந்தார். ஆகவே, தற்போதுள்ள சட்டதிட்டங்கள் மற்றும் கட்டளைச் சட்டங்கள் என்ற கட்டமைப்பிற்குள் இருந்து மக்களுக்கு உச்சபட்ச சேவையை வழங்குமாறும், அந்த சட்டக் கட்டமைப்பு அபிவிருத்திப் பணிகளுக்கு தடையாக இருந்தால், அந்த சட்டக் கட்டமைப்புகளை மாற்றியமைக்க அரசாங்கம் தயாராக இருப்பதாகவும் அவர் கூறினார். அரசியல் அதிகாரத்தின் அத்துடன் அரச பொறிமுறையின் பொறுப்பு, பயமின்றி இந்த நாட்டை ஒரு சிறந்த நாடாக மாற்றுவதே என்றும் அவர் தெரிவித்தார்.
இந்த விசேட ஒருங்கிணைப்புக் குழுக் கூட்டத்தில் புத்தசாசன, மத மற்றும் கலாசார அலுவல்கள் பிரதி அமைச்சர் மற்றும் மாத்தளை மாவட்ட ஒருங்கிணைப்புக் குழுவின் தலைவர் கமகெதர திசாநாயக்க, மத்திய மாகாண ஆளுநர் மற்றும் குழுவின் இணைத் தலைவர் பேராசிரியர் சரத் அபயகோன், பாராளுமன்ற உறுப்பினர்களான சுனில் பியன்வில மற்றும் தினேஷ் ஹேமந்த ஆகியோர் உட்பட பலர் கலந்துகொண்டனர். அத்துடன், மத்திய மாகாண பிரதம செயலாளர் அஜித் பிரேமசிங்க, அத்தியாவசிய சேவைகள் ஆணையாளர் நாயகம் மற்றும் ஜனாதிபதி பணிக்குழாம் தலைவர் பிரபாத் சந்திரகீர்த்தி, பாதுகாப்பு அமைச்சின் செயலாளர் ஓய்வுபெற்ற விமானப்படை துணைத் தளபதி சம்பத் துய்யகொந்தா மற்றும் மாத்தளை மாவட்ட செயலாளர் எல். பி. மதனாயக்க ஆகியோரும் இந்த நிகழ்வில் கலந்துகொண்டனர்.