களுத்துறை, கல்பாத்த பிரதேசத்தில் நடத்தப்பட்டு வந்த மதுபானக் கடத்தலை சுற்றிவளைக்கச் சென்ற பொலிஸ் உத்தியோகத்தர்கள் குழுவை, அங்கு இருந்த ஒரு பெண் எட்டு கொடூரமான நாய்களை ஏவி கடிக்கச் செய்த சம்பவம் களுத்துறை தெற்கு பொலிஸாரால் பதிவாகியுள்ளது. இந்த பயங்கர தாக்குதல் காரணமாக அங்குருவாதொட்ட பொலிஸ் நிலைய பொறுப்பதிகாரி உட்பட நான்கு உத்தியோகத்தர்கள் காயமடைந்துள்ளனர்.
காயமடைந்தவர்களில், நிலையப் பொறுப்பதிகாரி, பொலிஸ் பரிசோதகர் அசங்க ராஜகருணா மற்றும் பொலிஸ் கான்ஸ்டபிள் (96625) மனோஜ் ஆகிய இரண்டு உத்தியோகத்தர்கள் களுத்துறை நாகொட பொது மருத்துவமனையில் அனுமதிக்கப்பட்டுள்ளனர். பொலிஸ் பரிசோதகர் சுதீர மற்றும் கான்ஸ்டபிள் (83935) கிரிஷாந்த ஆகிய உத்தியோகத்தர்களும் சிறிய காயங்களுக்கு உள்ளாகியுள்ளனர்.சட்டவிரோத மதுபானக் கடத்தல் நடந்த இந்த வீடு களுத்துறை வடக்கு பொலிஸ் பிரிவுக்குட்பட்ட சொஹொன பஹல தியகம பிரதேசத்தில் அமைந்துள்ளது. 8 முதல் 10 அடி உயரமுள்ள சுவர்களால் சூழப்பட்ட இந்த வளாகத்தில் நீண்ட காலமாக மிகவும் சூட்சுமமாக, மதுபானம் அருந்துபவர்களுக்குத் தேவையான சிற்றுண்டிகளையும் வழங்கி உணவகம் போல இந்த கடத்தல் வெற்றிகரமாக நடத்தப்பட்டு வந்துள்ளது. இதற்கு முன்னர் இரண்டு சந்தர்ப்பங்களில் களுத்துறை பொலிஸின் இரண்டு சிறப்புப் பிரிவுகள் இந்த இடத்தை சுற்றிவளைக்க முயன்ற போதிலும், அது சரியாக நடைபெறாததால், களுத்துறை மாவட்டப் பொறுப்பு பிரதிப் பொலிஸ் மா அதிபர் பத்மினி வீரசூரிய அம்மையாரின் உத்தரவின் பேரில் கடந்த 27ஆம் திகதி இந்த சுற்றிவளைப்பை மேற்கொள்ளும் பொறுப்பு அங்குருவாதொட்ட பொலிஸாரிடம் ஒப்படைக்கப்பட்டது.
அதன்படி, அங்குருவாதொட்ட பொலிஸ் நிலைய பொறுப்பதிகாரி தலைமையிலான குழுவினர் சம்பந்தப்பட்ட வீட்டை சுற்றிவளைத்து, 1000 மில்லி லீட்டர் சட்டவிரோத மதுபானத்துடன் சந்தேகநபரை கைது செய்துள்ளனர். அப்போது, சந்தேகநபரான கடத்தல்காரரின் மனைவி, வீட்டில் கூண்டுகளில் அடைக்கப்பட்டிருந்த ஜேர்மன் ஷெப்பர்ட் மற்றும் ரோட்வைலர் உட்பட எட்டு விலையுயர்ந்த கொடூரமான நாய்களின் கூண்டுகளை ஒரே நேரத்தில் திறந்து பொலிஸ் உத்தியோகத்தர்கள் மீது ஏவிவிட்டுள்ளார். பொலிஸ் கடமைக்கு இடையூறு விளைவித்து மேற்கொள்ளப்பட்ட இந்த குற்றவியல் அத்துமீறல் மற்றும் தாக்குதல் தொடர்பாக, மதுபானக் கடத்தல்காரருடன் அவரது மனைவியும் பொலிஸாரால் கைது செய்யப்பட்டு மேலதிக விசாரணைகள் மேற்கொள்ளப்பட்டு வருகின்றன.
