8 கோடி ரூபாய்க்கும் அதிகமான பணத்தை சட்டவிரோதமாகப் பணமாக்கிய குற்றச்சாட்டின் பேரில் கொழும்பு மேல் நீதிமன்றத்தில் தாக்கல் செய்யப்பட்ட வழக்கிலிருந்து தன்னை விடுவிக்குமாறு கோரி முன்னாள் ஜனாதிபதி மஹிந்த ராஜபக்ஷவின் புதல்வர் யோஷித ராஜபக்ஷ தாக்கல் செய்த திருத்த மனுவை விசாரணைக்கு எடுத்துக்கொள்ள மேன்முறையீட்டு நீதிமன்றம் தீர்மானித்துள்ளது. நீதிபதிகளான அமல் ரணராஜா மற்றும் சுமுது பிரேமச்சந்திர ஆகியோர் அடங்கிய நீதிபதிகள் குழாம் இந்த அனுமதியை வழங்கியது.
மூன்று வருட காலப்பகுதியில் இரத்மலானை மற்றும் தெஹிவளை பிரதேசங்களில் காணிகள் உள்ளிட்ட சொத்துக்களை கொள்வனவு செய்து, குறித்த பணத்தை சட்டவிரோதமாகப் பணமாக்கியதாக சட்டமா அதிபரால் இந்த வழக்கு தாக்கல் செய்யப்பட்டுள்ளது. மனுதாரர் சார்பில் ஆஜரான சட்டத்தரணி ஹஃபில் ஃபாரிஸ் நீதிமன்றத்தில் சுட்டிக்காட்டியதாவது, இந்த வழக்கில் இணை பிரதிவாதியாக இருந்த டெய்சி பொரஸ்ட் என்பவரை மேல் நீதிமன்றம் விடுவித்துள்ள நிலையில், தனது சேவைதாரருக்கு எதிராக மட்டும் ‘சதி செய்தல்’ என்ற குற்றச்சாட்டை மேலும் தொடர முடியாது. பிரதிவாதி விடுவிக்கப்பட்ட நிலையில் ஒருவருக்கு மட்டும் சதி குற்றச்சாட்டுகளை சுமத்துவது சட்டத்திற்கு முரணானது என்பதால், சட்டமா அதிபர் இந்த குற்றப்பத்திரிகையை மீளப் பெற வேண்டும் என்றும் அவர் மேலும் வலியுறுத்தினார்.
எவ்வாறாயினும், சட்டமா அதிபர் சார்பில் ஆஜரான பிரதி சொலிசிட்டர் ஜெனரல் ஜனக பண்டார, டெய்சி பொரஸ்ட் என்பவர் மருத்துவ காரணங்களுக்காக மட்டுமே வழக்கிலிருந்து விடுவிக்கப்பட்டதாகக் கூறினார். மருத்துவ அறிக்கைகளின்படி, அவருக்கு வழக்கு விசாரணையை எதிர்கொள்ள சரியான மனநலத் தகுதி இல்லை என்பது உறுதிப்படுத்தப்பட்டுள்ளது என்றும், அந்த தொழில்நுட்பக் காரணத்தின் அடிப்படையில் அவரை விடுவிப்பது முதல் பிரதிவாதிக்கு எதிரான வழக்கை நடத்துவதற்கு எந்த சட்டத் தடையையும் ஏற்படுத்தாது என்றும் அவர் சுட்டிக்காட்டினார்.
சம்பந்தப்பட்ட அனைத்து விடயங்களையும் பரிசீலித்த மேன்முறையீட்டு நீதிமன்ற நீதிபதிகள் குழாம், இந்த திருத்த மனுக்கள் மீதான விசாரணையை ஜூன் மாதம் 16 ஆம் திகதி நடத்துமாறு உத்தரவிட்டது. அதனுடன் தொடர்புடையதாக சட்டமா அதிபருக்கு ஏதேனும் ஆட்சேபனை இருந்தால், அதை ஜூன் 08 ஆம் திகதிக்கு முன்னரும், அதற்கு எதிராக மனுதாரர் தரப்பின் எதிர் ஆட்சேபனைகள் இருந்தால், அவற்றை ஜூன் 11 ஆம் திகதிக்கு முன்னரும் தாக்கல் செய்யுமாறு நீதிமன்றம் இரு தரப்பினருக்கும் மேலும் உத்தரவிட்டது.