மகியங்கனை ரஜமகா விகாரையில் இருந்து திருடப்பட்ட பழங்கால மதிப்புமிக்க சமாதி புத்தர் சிலையை கண்டி பிரதேசத்தில் விற்க முயன்ற குழுவினரை கண்டி தலைமையக பொலிஸ் குற்றப் புலனாய்வுப் பிரிவினர் கைது செய்துள்ளனர். இச்சம்பவம் தொடர்பாக கைது செய்யப்பட்ட சந்தேகநபர்களில் குருநாகல் பிரதேசத்தைச் சேர்ந்த ஒரு பௌத்த பிக்கு, இராணுவத்தின் ஓய்வுபெற்ற இரண்டு சான்றளிக்கப்பட்ட அதிகாரிகள் மற்றும் ஒரு சிவில் நபர் ஆகியோர் அடங்குவர். இவர்கள் அனைவரும் எதிர்வரும் 17ஆம் திகதி வரை விளக்கமறியலில் வைக்க கண்டி நீதவான் சமர விக்ரமநாயக்க உத்தரவிட்டுள்ளார்.
கடந்த 2025 ஆம் ஆண்டு ஒக்டோபர் மாதம் 23 ஆம் திகதி மகியங்கனை ராஜ மகா விகாரையில் இருந்து இந்த புத்தர் சிலை திருடப்பட்டதாக பொலிஸ் விசாரணைகளில் உறுதி செய்யப்பட்டுள்ளது. பின்னர் மே மாதம் 14 ஆம் திகதி கண்டி நகருக்கு கொண்டு வரப்பட்டு, அங்கு ஒரு மோட்டார் வாகனத்திற்குள் சிலை மறைத்து வைக்கப்பட்டு, அதன் சில பகுதிகள் வெட்டி அகற்றப்பட்டு, உலோகப் பரிசோதனைக்கு உட்படுத்தப்பட்டு, அதற்கான அறிக்கைகள் பெறப்பட்டுள்ளதாக தெரிவிக்கப்பட்டுள்ளது. இச்செயல்பாட்டில் பதுளை பிரதேசத்தைச் சேர்ந்த ஓய்வுபெற்ற இராணுவ சான்றளிக்கப்பட்ட அதிகாரிகள் இருவரும் நேரடியாக ஈடுபட்டுள்ளனர். அவர்கள் வந்த மோட்டார் வாகனமும் கண்டி குமார வீதியில் நிறுத்தப்பட்டிருந்த போது பொலிஸாரால் கைப்பற்றப்பட்டுள்ளது.
இந்த சிலையை சட்டபூர்வமாக கொண்டு செல்வதைக் காட்டுவதற்காக சந்தேகநபர்கள் ஒரு தந்திரமான உத்தியையும் பயன்படுத்தியுள்ளனர். எதிர்வரும் வெசாக் பௌர்ணமியை முன்னிட்டு பக்தர்கள் வழிபடுவதற்காக சிலையை மெருகூட்டி சுத்தம் செய்ய கண்டிக்கு கொண்டு செல்லப்படுவதாகக் குறிப்பிட்டு குருநாகல் இப்பாகமுவ பிரதேசத்தில் உள்ள ஒரு விகாரையின் பௌத்த பிக்கு ஒருவரால் தயாரிக்கப்பட்ட போலியான கடிதம் இவர்களிடம் இருந்து கண்டெடுக்கப்பட்டுள்ளது. அந்தக் கடிதத்தின் அடிப்படையில் விசாரணைகளை மேற்கொண்ட பொலிஸார், சம்பந்தப்பட்ட பௌத்த பிக்குவை கைது செய்து விசாரித்தபோது, வேறு ஒரு தரப்பினரால் இந்த சிலை அவருக்கு வழங்கப்பட்டது தெரியவந்துள்ளது. அதன்படி, இதற்கு உதவிய வேவெல்தெனிய மிஹிந்தலை பிரதேசத்தைச் சேர்ந்த ஒருவரும் பொலிஸாரால் கைது செய்யப்பட்டார்.
திருடப்பட்ட இந்த புத்தர் சிலைக்கு மகியங்கனை விகாரையில் அதிகாரப்பூர்வ தொல்பொருள் சான்றிதழ் உள்ளதாக பொலிஸார் சுட்டிக்காட்டுகின்றனர். அதன்படி, 1940 ஆம் ஆண்டின் 09 ஆம் இலக்க தொல்பொருள் கட்டளைச் சட்டம் மற்றும் 1998 ஆம் ஆண்டின் 24 ஆம் இலக்க புதிய திருத்தச் சட்டம் ஆகியவற்றின் கீழ் தொல்பொருட்களுக்கு சேதம் விளைவித்தல் மற்றும் பழங்காலச் சொத்தை திருடி விற்க முயற்சித்தல் ஆகிய குற்றச்சாட்டுகளின் கீழ் சந்தேகநபர்களுக்கு எதிராக வழக்குத் தொடரப்பட்டுள்ளது. கண்டி தலைமையக பிரதான பொலிஸ் பரிசோதகர் ரஷிக சம்பத் பத்திரணவுக்கு கிடைத்த தகவலின் அடிப்படையில், அவரது அறிவுறுத்தலின் பேரில் குற்றப் புலனாய்வுப் பிரிவின் பொறுப்பதிகாரி பொலிஸ் பரிசோதகர் எஸ்.யூ.கே. லியனாராச்சி தலைமையில், உப பொலிஸ் பரிசோதகர் பண்டார, பொலிஸ் சார்ஜென்ட்கள் இந்திக (32870), கனக (40869) மற்றும் பொலிஸ் கான்ஸ்டபிள்கள் மதுசங்க (69856) மற்றும் கனிஷ்க (87865) ஆகிய அதிகாரிகள் குழு இந்த சுற்றிவளைப்பை மேற்கொண்டுள்ளது.
