கொஸ்கம பிரதேசத்தில் தாவல்கொட ஆற்றில் மூழ்கி உயிரிழந்த இரண்டு இளைஞர்களின் உடல்கள் புதைக்கப்பட்டிருந்த பிரணாகம மயானத்தில் உள்ள இரண்டு கல்லறைகள் மர்மமான காரியங்களுக்காக சிலரால் தோண்டப்பட்டுள்ளன. தனது மனைவிக்கு ஏற்பட்டதாகக் கூறப்படும் பிசாசு தோஷத்தை நீக்குவதற்காக மஹியங்கணை பிரதேசத்தில் இருந்து வந்த மந்திரவாதிகள் குழுவொன்றினால் இந்தச் செயல் மேற்கொள்ளப்பட்டுள்ளதாக ஆரம்பக்கட்ட பொலிஸ் விசாரணைகளில் தெரியவந்துள்ளது.
இந்த துரதிர்ஷ்டவசமான சம்பவம் குறித்து முறைப்பாடுகள் கிடைத்ததை அடுத்து, கொஸ்கம பொலிஸார் விசாரணைகளை ஆரம்பித்தனர். இதற்காக, அப்பகுதியைச் சுற்றியுள்ள சிசிடிவி கமரா காட்சிகளை அதிகாரிகள் ஆய்வு செய்தனர். அந்த காட்சிகளில், பிசாசு பலி பூஜைக்கான உபகரணங்களை லொரி மற்றும் மோட்டார் சைக்கிளில் கொண்டு வந்த சிலர், பின்னர் உடல்கள் புதைக்கப்பட்டிருந்த கல்லறைகளை தோண்டி, சுமார் இரண்டு அடி ஆழம் வரை சடங்குகளை செய்துள்ளமை தெரியவந்துள்ளது.
சந்தேகத்திற்கிடமான சம்பவம் தொடர்பாக சம்பந்தப்பட்ட வீட்டின் உரிமையாளர் கைது செய்யப்பட்டு விசாரிக்கப்பட்டபோது, தனது மனைவியின் நோயைக் குணப்படுத்த இந்த மந்திரவாதிகள் குழுவுடன் இணைந்து செயல்பட்டதை அவர் ஒப்புக்கொண்டார். கைது செய்யப்பட்ட சந்தேகநபர் அவிசாவளை நீதவான் நீதிமன்றத்தில் ஆஜர்படுத்தப்பட்ட பின்னர் பிணையில் விடுவிக்கப்பட்டார். நீதிமன்ற உத்தரவின் பேரில், உயிரிழந்த இளைஞர்களின் உறவினர்களுக்கு சம்பந்தப்பட்ட கல்லறைகளை மீண்டும் மூடுமாறு அறிவிக்கப்பட்டுள்ளது.
இந்தச் சம்பவம் காரணமாக கடந்த செவ்வாய்க்கிழமை மாலை அந்த மயானத்தைச் சுற்றி பெரும் பதற்றமான நிலை ஏற்பட்டது. கல்லறைகளுக்குள் இருந்த சவப்பெட்டிகளுக்கு சேதம் ஏற்பட்டுள்ளதா என்ற சந்தேகத்தின் பேரில் அப்பகுதி மக்கள் மீண்டும் அந்த குழிகளைத் தோண்டி ஆய்வு செய்தனர். இந்தச் சம்பவத்துடன் தொடர்புடைய மந்திரவாதிகள் குழுவைக் கைது செய்ய கொஸ்கம பொலிஸார் மேலதிக விசாரணைகளை மேற்கொண்டு வருகின்றனர்.