முன்னாள் ஜனாதிபதி ரணில் விக்கிரமசிங்கவினால் 16.6 மில்லியன் ரூபா அரச நிதியை துஷ்பிரயோகம் செய்து பிரித்தானியாவிற்கு விஜயம் செய்த சம்பவம் தொடர்பில், முன்னாள் முதல் பெண்மணி பேராசிரியர் மைத்ரி விக்கிரமசிங்கவிற்கு எதிராக சட்ட நடவடிக்கை எடுக்க வேண்டாம் என குற்றப் புலனாய்வுத் திணைக்களம் தீர்மானித்துள்ளது. பிரித்தானியாவின் வுல்வர்ஹாம்டன் பல்கலைக்கழகத்தினால் மைத்ரி விக்கிரமசிங்கவிற்கு கௌரவப் பேராசிரியர் பதவி வழங்கப்பட்ட பட்டமளிப்பு விழாவில் கலந்துகொள்வதற்காகவே இந்த விஜயம் மேற்கொள்ளப்பட்டது.
மைத்ரி விக்கிரமசிங்கவிற்கு எதிராக நீதிமன்றத்தில் குற்றப்பத்திரிகை தாக்கல் செய்வதற்கு போதுமான ஆதாரங்கள் இல்லை என குற்றப் புலனாய்வுத் திணைக்களம் ஏற்கனவே சட்டமா அதிபருக்கு உத்தியோகபூர்வமாக அறிவித்துள்ளது.
எவ்வாறாயினும், ஐக்கிய இராச்சியத்திற்கான இந்த விஜயத்திற்காக அரச நிதியைப் பயன்படுத்தியமை தொடர்பில் முன்னாள் ஜனாதிபதி ரணில் விக்கிரமசிங்க மற்றும் முன்னாள் ஜனாதிபதி செயலாளர் சமன் ஏக்கநாயக்க ஆகியோருக்கு எதிராக சட்ட நடவடிக்கை எடுப்பதற்கான சாத்தியக்கூறுகள் குறித்து அதிகாரிகள் தற்போது ஆராய்ந்து வருகின்றனர். பொதுச் சொத்துச் சட்டத்தின் கீழ் குற்றவியல் ரீதியான தவறான பயன்பாடு என்ற குற்றச்சாட்டின் பேரில் அவர்களுக்கு எதிராக குற்றப்பத்திரிகை தாக்கல் செய்ய தயாராகி வரும் நிலையில், இது தொடர்பில் சட்டமா அதிபரின் ஆலோசனையைப் பெற குற்றப் புலனாய்வுத் திணைக்களம் எதிர்பார்க்கிறது.
இந்தச் சம்பவம் தொடர்பான வழக்கு ஜூன் மாதம் 08ஆம் திகதி கொழும்பு கோட்டை நீதவான் நீதிமன்றத்தில் மீண்டும் விசாரணைக்கு வரவுள்ளது.