பிரித்தானிய அரச கடற்படையில் சேவையாற்றிய ஒரே பெண் கமாண்டோ அதிகாரி உட்பட மூவர் டெவன் பிரதேசத்தில் இடம்பெற்ற ஹெலிகொப்டர் விபத்தில் உயிரிழந்துள்ளனர். கடந்த புதன்கிழமை அதிகாலை 4:00 மணியளவில் சோர்டன் டவுன் பிரதேசத்தில் உள்ள வயல்வெளி ஒன்றில் வீழ்ந்த இந்த MK4 ரக மெர்லின் ஹெலிகொப்டர் விபத்துக்குள்ளானபோது, அங்கு இராணுவப் பயிற்சி ஒத்திகை ஒன்று இடம்பெற்றுக்கொண்டிருந்தது.
கடும் காற்று, பலத்த மழை மற்றும் குறைந்த பார்வை கொண்ட மிகவும் மோசமான வானிலை நிலவியபோது இந்த விபத்து இடம்பெற்றதாகவும், இதில் விமானம் முழுமையாக அழிந்துவிட்டதாகவும் தெரிவிக்கப்பட்டுள்ளது.இவ்வாறு துரதிர்ஷ்டவசமாக உயிரிழந்தவர்கள் 31 வயதான லெப்டினன்ட் லில்லி-மே ஃபிஷர், 42 வயதான லெப்டினன்ட் கமாண்டர் கிறிஸ் கேசன் மற்றும் 24 வயதான தலைமை அதிகாரி ஓவன் கிரீன் ஆகிய மூவர் என பிரித்தானிய பாதுகாப்பு அமைச்சு உறுதிப்படுத்தியுள்ளது. பாதுகாப்புச் செயலாளர் ஜோன் ஹீலி மற்றும் கமாண்டோ ஹெலிகொப்டர் படையணியின் தளபதி கேர்ணல் வில் பென்மன் ஆகியோர் இந்த மூன்று அதிகாரிகளையும் தங்கள் படைகளுக்கு உயர் அர்ப்பணிப்புடன் செயல்பட்ட சிறந்த நிபுணர்கள் என்று குறிப்பிட்டு, அவர்களின் மறைவுக்கு ஆழ்ந்த இரங்கலைத் தெரிவித்துள்ளனர். தற்போது விபத்துக்கான காரணத்தை கண்டறிய விசேட விசாரணை ஆரம்பிக்கப்பட்டுள்ளதுடன், உயிரிழந்தவர்களின் குடும்ப உறுப்பினர்களுக்கும் இது குறித்து அறிவிக்கப்பட்டுள்ளது.
விபத்து நடந்தபோது ஹெலிகொப்டரின் எஞ்சின் செயலிழந்த சத்தம் கேட்டதாகவும், அதன் பின்னர் வானம் முழுவதும் ஒரு பெரிய சிவப்பு ஒளி பரவி சில நிமிடங்களுக்குப் பிறகு ஒரு பெரிய வெடிப்புச் சத்தம் கேட்டதாகவும் பிரதேசவாசிகள் சாட்சியமளித்துள்ளனர். இந்த விபத்துக்குள்ளான மெர்லின் MK4 ஹெலிகொப்டர்கள் பொதுவாக கடல் எல்லை கண்காணிப்புப் பணிகள், தேடல் மற்றும் மீட்புப் பணிகள் அத்துடன் நீர்மூழ்கிக் கப்பல் எதிர்ப்புப் போர் நடவடிக்கைகளுக்காக பரவலாகப் பயன்படுத்தப்படுகின்றன. இதற்கு முன்னர் 2024 ஆம் ஆண்டிலும் இதேபோன்ற மெர்லின் விமானம் ஆங்கிலக் கால்வாயில் வீழ்ந்ததில் லெப்டினன்ட் ரோட்ரி லீஷன் என்ற அதிகாரி உயிரிழந்திருந்தார்.
உயிரிழந்த லிலீ-மே ஃபிஷர் அம்மையார் 2019 மே மாதம் அரச கடற்படையில் இணைந்துள்ளார். மிகக் குறைவான பெண்களே வெற்றிபெறும் 16 வார கடினமான அனைத்து ஆயுத கமாண்டோ பாடநெறியை அவர் வெற்றிகரமாக முடித்திருந்தார். விளையாட்டிலும் சிறந்து விளங்கிய அவர், 2021 ஆம் ஆண்டு ஐரோப்பிய ட்ரையத்லான் வயதுப் பிரிவு சாம்பியன்ஷிப்பில் பிரித்தானியாவைப் பிரதிநிதித்துவப்படுத்தியதுடன், பிரித்தானியாவின் பிரபலமான பல தொலைக்காட்சி நிகழ்ச்சிகளிலும் பங்கேற்றுள்ளார். அரச கடற்படைப் பாடநெறிகளை பெண்களாலும் வெற்றிகரமாக முடிக்க முடியும் என்று உறுதியாக நம்பிய அவர், நாட்டிற்காக சேவை செய்வது தனக்குக் கிடைத்த ஒரு பெரிய கௌரவம் என்று இதற்கு முன்னர் கருத்துத் தெரிவித்திருந்தார்.
இந்த துயரச் சம்பவம் குறித்து பிரித்தானியப் பிரதமர் கீர் ஸ்டார்மர் தனது வருத்தத்தைத் தெரிவித்து, அவசர நிவாரண சேவை குழுக்களின் பங்களிப்புக்கு நன்றி தெரிவித்துள்ளார். அத்துடன், கடற்படையின் விமானப் படையின் தலைவராகச் செயற்படும் வேல்ஸ் இளவரசி கேட் மிடில்டன் அம்மையாரும் ஒரு அறிக்கையை வெளியிட்டு, தானும் இளவரசர் வில்லியமும் இந்த கடினமான நேரத்தில் உயிரிழந்த அதிகாரிகளின் குடும்ப உறுப்பினர்கள் மற்றும் நண்பர்களுடன் எப்போதும் இருப்போம் என்று தெரிவித்துள்ளார்.
