சர்வதேச கிரிக்கெட் கவுன்சில் (ICC) இலங்கை கிரிக்கெட் நிறுவனத்தின் தேர்தலை விரைவில் நடத்துமாறு அதிகாரிகளுக்கு அறிவுறுத்தியுள்ளது. இலங்கை கிரிக்கெட் நிறுவனத்தின் அரசியலமைப்பை திருத்தும் பணிகளில் முன்னேற்றம் காணப்பட்டாலும், சர்வதேச கிரிக்கெட் கவுன்சிலின் வாரியக் கூட்டங்களில் இலங்கை கிரிக்கெட் நிறுவனத்திற்கு பிரதிநிதித்துவப்படுத்தும் உரிமை இன்னும் இல்லை என்று அந்த சங்கம் மேலும் சுட்டிக்காட்டுகிறது.
மேலும், அரசியல் தலையீடுகள் காரணமாக, கடந்த காலங்களில் நடந்தது போலவே, இலங்கை கிரிக்கெட் நிறுவனம் மீண்டும் கறுப்புப் பட்டியலில் சேர்க்கப்படும் அபாயம் உள்ளதாகவும் சர்வதேச கிரிக்கெட் அமைப்பு எச்சரித்துள்ளது.
எவ்வாறாயினும், ஜூன் 22 அன்று கொழும்பில் சர்வதேச கிரிக்கெட் கவுன்சில் தலைவர் ஜெய் ஷா மற்றும் ஜனாதிபதி அனுர குமார திசாநாயக்க இடையே நடைபெற்ற பேச்சுவார்த்தையின் போது ஜூலை 31 ஆம் தேதிக்குள் தேர்தலை நடத்துமாறு கோரிக்கை விடுக்கப்பட்டதாக அண்மையில் செய்திகள் வெளியாகின.
எனினும், ஜனாதிபதி ஊடகப் பிரிவு அந்தச் செய்தியை பொய்யானது மற்றும் தவறான தகவல்களைத் தருவது என நிராகரித்துள்ளது. இலங்கை கிரிக்கெட் நிறுவனத்தின் புதிய இடைக்காலக் குழுவும் இது குறித்து கருத்துத் தெரிவிக்கையில், தேர்தல் நடத்துவது அல்லது கறுப்புப் பட்டியலில் சேர்க்கும் அச்சுறுத்தல் குறித்து அத்தகைய பேச்சுவார்த்தை எதுவும் நடைபெறவில்லை என்று கூறியது.