இலங்கையின் சிறைச்சாலை அமைப்பில் நிலவும் கடுமையான நெரிசல் மற்றும் அண்மையில் நீர்கொழும்பு சிறைச்சாலையில் ஏற்பட்ட துயரமான மோதல் நிலைமைக்கு விரைவான தீர்வைக் காண்பதற்காக, கண்டி நகரில் அமைந்துள்ள வரலாற்றுச் சிறப்புமிக்க பழைய போகம்பரை சிறைச்சாலை வளாகத்தை மீண்டும் ஒரு சிறைச்சாலையாக ஸ்தாபிக்க அரசாங்கம் நடவடிக்கை எடுத்துள்ளது.
இதற்கான 2026 ஜூலை மாதம் 08 ஆம் திகதி புதன்கிழமை வெளியிடப்பட்ட இலக்கம் 2496/21 கொண்ட அதிவிசேட வர்த்தமானி அறிவித்தல் நீதி மற்றும் தேசிய ஒருமைப்பாட்டு அமைச்சர் ஹர்ஷண நானாயக்காரவினால் வெளியிடப்பட்டுள்ளது. சிறைச்சாலைகள் கட்டளைச் சட்டத்தின் (அத்தியாயம் 54) 2 ஆம் பிரிவின் கீழ் சம்பந்தப்பட்ட அமைச்சருக்கு வழங்கப்பட்டுள்ள அதிகாரங்களின்படி இந்தத் தீர்மானம் எடுக்கப்பட்டுள்ளதுடன், முழு இலங்கைக்கும் பொருந்தும் வகையில் எல்லைகளை நிர்ணயித்து இந்த பழைய போகம்பரை வளாகம் சிறைச்சாலைகள் கட்டளைச் சட்டத்தின் நோக்கங்களுக்காக உத்தியோகபூர்வமாகச் செயற்படும்.
இதற்கிடையில், காலி மஹமோதர பிரதேசத்திலும் ஒரு புதிய சிறைச்சாலையை நிறுவ அரசாங்கம் நடவடிக்கை எடுத்துள்ளது. அதன்படி, நீதி மற்றும் தேசிய ஒருமைப்பாட்டு அமைச்சர் ஹர்ஷண நானாயக்காரவின் கையொப்பத்துடன், சிறைச்சாலைகள் கட்டளைச் சட்டத்தின் 2 ஆம் பிரிவின் கீழ் முழு இலங்கைக்கும் பொருந்தும் வகையில் 2026 ஜூலை மாதம் 07 ஆம் திகதி செவ்வாய்க்கிழமை வெளியிடப்பட்ட இலக்கம் 2496/10 கொண்ட அதிவிசேட வர்த்தமானி அறிவித்தல் வெளியிடப்பட்டுள்ளது.
138 ஆண்டுகளாகச் செயற்பட்டு வந்த கண்டி வரலாற்றுச் சிறப்புமிக்க போகம்பரை சிறைச்சாலை, நாட்டில் மரண தண்டனை நிறைவேற்றப்பட்ட இரண்டு சிறைச்சாலைகளில் ஒன்றாக வரலாற்றில் இடம்பிடித்துள்ளது. 13 ஏக்கர் பரப்பளவில் அமைந்துள்ள இந்த சிறைச்சாலை இங்கிலாந்தின் எடின்பரோ விக்டோரியா மகாராணியின் கிரீடத்தின் மாதிரியிலும், பிரான்சின் பாரிஸ் பாஸ்டில் கோட்டையைப் போன்றும் கட்டப்பட்டுள்ளது. அங்கு தடுத்து வைக்கப்பட்டிருந்த கைதிகள் பல்லேகல தும்பர சிறைச்சாலைக்கு மாற்றப்பட்ட பின்னர், 2014 ஜனவரி 01 ஆம் திகதி முதல் இந்த சிறைச்சாலை மூடப்பட்டதுடன், பின்னர் பொதுமக்களின் பார்வைக்காக மட்டுமே திறந்திருந்தது.
இந்த போகம்பரை வளாகம் தொடர்பாக இதற்கு முன்னர் ஆட்சிக்கு வந்த அரசாங்கங்கள் பல்வேறு வணிக மற்றும் சுற்றுலாத் திட்டங்களைச் செயற்படுத்த எதிர்பார்த்தன. முன்னாள் ஜனாதிபதி ரணில் விக்கிரமசிங்கவின் அரசாங்கத்தின் கீழ் 2024 ஆம் ஆண்டில், அப்போதைய நகர அபிவிருத்தி மற்றும் வீடமைப்பு அமைச்சர் பிரசன்ன ரணதுங்க, போகம்பரை சிறைச்சாலையை ஹோட்டல் வளாகமாக மாற்றுவதற்கு ஒரு தனியார் முதலீட்டாளர் முன்வந்துள்ளதாகக் குறிப்பிட்டிருந்தார். அதன் பழமையையும் காலனித்துவ கட்டிடக்கலையையும் பாதுகாத்து, பிரதான சிறைச்சாலை வளாகத்தை வணிக வளாகங்கள், உணவு விற்பனை நிலையங்கள், ஒரு அருங்காட்சியகம் மற்றும் சுற்றுலா ஹோட்டல் உள்ளிட்ட வணிகக் கட்டிடமாக அபிவிருத்தி செய்ய அப்போது திட்டமிடப்பட்டிருந்தது.
அதன் பின்னர் ஆட்சிக்கு வந்த தற்போதைய அனுர குமார திசாநாயக்கவின் அரசாங்கத்தின் கீழும் இந்த வளாகத்தை சுற்றுலாத் துறைக்காகப் பயன்படுத்துவதற்கு ஆரம்பத்தில் தீர்மானிக்கப்பட்டிருந்தது. அதன்படி, நகர அபிவிருத்தி, நிர்மாணம் மற்றும் வீடமைப்பு அமைச்சரால் முன்வைக்கப்பட்ட ஒரு யோசனைக்கு அமைய, 2025 ஜூன் 03 ஆம் திகதி நடைபெற்ற அமைச்சரவைக் கூட்டத்தில், உலக பாரம்பரிய கட்டிடங்கள் பாதுகாப்பு திட்டத்தின் கீழ் இந்த வளாகத்தில் கலாச்சார மற்றும் சுற்றுலா மேம்பாட்டு நடவடிக்கைகளை மேற்கொள்வதற்கான முதலீட்டு முன்மொழிவுகளை அழைப்பதற்கும், இந்த நிலத்தை 50 வருட குத்தகை அடிப்படையில் ஒரு அபிவிருத்தி திட்டத்திற்கு வழங்குவதற்கும் அனுமதி வழங்கப்பட்டது.
எவ்வாறாயினும், இத்தகைய வணிக மற்றும் சுற்றுலாத் திட்டங்களுக்காக நீண்டகாலமாக திட்டமிடப்பட்டிருந்த வரலாற்றுச் சிறப்புமிக்க போகம்பரை வளாகத்தை, இவ்வாறு திடீரென மீண்டும் ஒரு சிறைச்சாலையாக வர்த்தமானி மூலம் அறிவிக்க அரசாங்கம் நிர்ப்பந்திக்கப்பட்டுள்ளது. நீர்கொழும்பு சிறைச்சாலையில் ஏற்பட்ட இரத்தக் களரி மோதல்களால் ஏற்பட்ட கடுமையான நெருக்கடி நிலைமையும், நாடு முழுவதும் உள்ள சிறைச்சாலை அமைப்பில் நிலவும் கடுமையான நெரிசலைக் கட்டுப்படுத்த வேண்டிய அவசரத் தேவையும் இதற்கு காரணமாகும்.
