சலியவெவ பிரதேசத்தில் புகையிலை கலந்த வெற்றிலை தானசாலை நடத்திய ஒருவருக்கு எதிராக சட்ட நடவடிக்கை எடுக்க தம்போவ மற்றும் கலாஓயா பொது சுகாதார பரிசோதகர்கள் நடவடிக்கை எடுத்துள்ளனர். கருவலாகஸ்வெவ சுகாதார மருத்துவ அதிகாரி பிரிவுக்கு அமுலாகும் வகையில் ஏற்பாடு செய்யப்பட்டிருந்த இந்த தானசாலை குறித்து பொது சுகாதார பரிசோதகர்களுக்கு தகவல் கிடைத்திருந்ததுடன், அதன்படி உடனடியாக செயற்பட்ட அதிகாரிகள் குழுவினால் இந்த சுற்றிவளைப்பு மேற்கொள்ளப்பட்டுள்ளது.
பொது சுகாதார பரிசோதகர்கள் குறித்த இடத்தை பரிசோதிக்கும் சந்தர்ப்பத்திலும் அங்கு வந்திருந்தவர்களுக்கு புகையிலை கலந்த வெற்றிலை விநியோகிக்கப்பட்டு வந்ததாக தெரிவிக்கப்படுகிறது. பின்னர் அதிகாரிகள் அந்த இடத்திற்கு பொறுப்பாக செயற்பட்ட நபருக்கு முறையான அனுமதியின்றி இவ்வாறான தானசாலை நடத்துவது சட்டவிரோதமானது என்பது குறித்து விளக்கமளித்துள்ளனர். எவ்வாறாயினும், அந்த ஆலோசனையை ஏற்க மறுத்த குறித்த நபர், சுகாதார அதிகாரிகளின் உத்தியோகபூர்வ கடமைகளுக்கு இடையூறு விளைவித்து அமைதியற்ற முறையில் நடந்து கொண்டுள்ளார்.
அங்கு ஏற்பட்ட பதற்றமான சூழ்நிலை காரணமாக பொது சுகாதார பரிசோதகர்கள் உடனடியாக சலியவெவ பொலிஸ் நிலையத்திற்கு தொலைபேசி மூலம் அறிவித்து பொலிஸ் அதிகாரிகள் குழுவொன்றை அந்த இடத்திற்கு வரவழைத்துள்ளனர். அதன்படி செயற்பட்ட பொலிஸ் அதிகாரிகள் சம்பவத்துடன் தொடர்புடைய நபர் மற்றும் அதிகாரிகளிடமிருந்து வாக்குமூலங்களை பதிவு செய்துள்ளனர். அரசாங்க அதிகாரிகளின் கடமைக்கு இடையூறு விளைவித்து சட்டவிரோதமாக தானசாலை நடத்திய அந்த நபருக்கு எதிர்வரும் ஜூலை மாதம் 9ஆம் திகதி புத்தளம் நீதிமன்றத்தில் ஆஜராகுமாறு அறிவித்து வழக்குத் தொடர நடவடிக்கை எடுக்கப்பட்டுள்ளது.