நேற்று நள்ளிரவு முதல் அமுலுக்கு வரும் வகையில், நாட்டின் முன்னணி எரிவாயு நிறுவனமான லிட்ரோ காஸ் லங்கா நிறுவனம் தனது வீட்டு எரிவாயு சிலிண்டர்களின் விலையை குறைத்துள்ளது. இதன்படி, மக்கள் பரவலாகப் பயன்படுத்தும் 12.5 கிலோ வீட்டு எரிவாயு சிலிண்டரின் விலை 300 ரூபாவால் குறைக்கப்பட்டுள்ளதோடு, அதன் புதிய சில்லறை விலை 4,465 ரூபாவாகக் குறைந்துள்ளது.
மேலும், 5 கிலோ சிறிய லிட்ரோ எரிவாயு சிலிண்டரின் விலை 118 ரூபாவால் குறைக்கப்பட்டு, அதன் புதிய விலை 1,792 ரூபாவாகப் பதிவு செய்யப்பட்டுள்ளது. அத்துடன், 2.3 கிலோ எரிவாயு சிலிண்டரின் விலை 55 ரூபாவால் குறைக்கப்பட்டதால், நுகர்வோர் அதனை 835 ரூபாவுக்கு வாங்க வாய்ப்பு கிடைக்கிறது.
லிட்ரோ நிறுவனத்திற்கு இணையாக, லாஃப்ஸ் எரிவாயு நிறுவனமும் நேற்று நள்ளிரவு முதல் தனது தயாரிப்புகளின் விலையை கணிசமான அளவில் குறைத்துள்ளது. அதன்படி, அந்நிறுவனம் விற்பனை செய்யும் 12.5 கிலோ வீட்டு எரிவாயு சிலிண்டரின் விலை 1,280 ரூபா என்ற அதிக தொகையால் குறைக்கப்பட்டு, அதன் புதிய விலை 4,965 ரூபாவாக அறிவிக்கப்பட்டுள்ளது.
அத்துடன், லாஃப்ஸ் நிறுவனத்தின் 5 கிலோ எரிவாயு சிலிண்டரின் விலையும் 512 ரூபாவால் குறைக்க நடவடிக்கை எடுக்கப்பட்டுள்ளது. அதன்படி, நுகர்வோர் அந்த சிலிண்டரை 1,988 ரூபா என்ற புதிய விலைக்கு வாங்க முடியும்.