இலங்கையின் தனியார் துறையில் நான்கு இலட்சத்திற்கும் அதிகமான வெற்றிடங்கள் நிலவுவதாகவும், உள்ளூர் ரீதியாக நிலவும் கடுமையான தொழிலாளர் பற்றாக்குறையால் இந்த இடைவெளியை நிரப்ப வெளிநாட்டுத் தொழிலாளர்களை நியமிக்க தொழில்துறை உரிமையாளர்கள் நிர்பந்திக்கப்பட்டுள்ளதாகவும் கைத்தொழில் மற்றும் தொழில் முயற்சி அபிவிருத்தி அமைச்சர் சுனில் ஹந்துன்னெத்தி தெரிவித்தார். குறிப்பாக, திறமையான மற்றும் திறமையற்ற தொழிலாளர்கள் என இரு துறைகளிலும் தொழிலாளர் பற்றாக்குறை நிலவுவதால், சீனா மற்றும் இந்தியா போன்ற நாடுகளில் இருந்து தொழிலாளர்களை இறக்குமதி செய்ய தனியார் துறை ஆர்வம் காட்டுவதாகவும் அமைச்சர் மேலும் குறிப்பிட்டார்.
கட்டுமானத் துறை, வாகனத் தொழில், காலணி மற்றும் தோல் பொருட்கள் உற்பத்தி, அத்துடன் ஓடுகள் மற்றும் அதனுடன் தொடர்புடைய பாகங்கள் உற்பத்தித் தொழில்கள் போன்ற நாட்டின் பொருளாதாரத்திற்கு முக்கியமான பல முக்கிய துறைகளில் இந்த தொழிலாளர் பற்றாக்குறை தாக்கத்தை ஏற்படுத்தியுள்ளது. தற்போதுள்ள தொழில்துறை நடவடிக்கைகளைத் தொடர்ச்சியாகப் பேணுவதற்குப் போதுமான உள்ளூர் தொழிலாளர் படை இல்லாததே இந்த நிலைமைக்கு முக்கிய காரணம் என்று தெரிவிக்கப்பட்டுள்ளது.
கைத்தொழில் மற்றும் தொழில் முயற்சி அபிவிருத்தி அமைச்சு, புனர்வாழ்வு பணியகம், தொழில் பயிற்சி அதிகார சபை மற்றும் தேசிய அபாயகர ஔடதங்கள் கட்டுப்பாட்டுச் சபை இணைந்து செயற்படுத்தும் ஒரு கூட்டுத் திட்டம் தொடர்பான கலந்துரையாடலின் போது அமைச்சர் இந்த விடயங்களை வெளிப்படுத்தினார். இவ்வாறான தொழிலாளர் பற்றாக்குறைக்கு ஒரு தீர்வாக, புனர்வாழ்வளிக்கப்பட்ட இளைஞர்களுக்கு தொழில் பயிற்சி அளித்து, அவர்களை தொழில்துறை தொழிலாளர் படையில் இணைத்துக்கொள்வதற்கான முறையான திட்டத்தை அமைச்சின் நேரடி மேற்பார்வையின் கீழ் செயற்படுத்துமாறு அவர் சம்பந்தப்பட்ட அதிகாரிகளுக்கு அறிவுறுத்தியுள்ளார்.