அடுத்த 2027 ஆம் ஆண்டுக்காகத் தெரிவு செய்யப்படும் பாடசாலை மாணவர்கள், பிரிவெனா கல்வி கற்கும் இல்லற மற்றும் துறவற மாணவர்கள் அத்துடன் சீலமாதாக்களுக்காக இலவசமாக ஒரு ஜோடி காலணிகள் வழங்கும் ஒரு விசேட நிகழ்ச்சித்திட்டத்திற்கு அமைச்சரவையின் அனுமதி கிடைத்துள்ளது. கல்வி, உயர்கல்வி மற்றும் தொழிற்கல்வி அமைச்சராகவும் உள்ள பிரதமர் அவர்களால் முன்வைக்கப்பட்ட யோசனைக்கு அமைய இந்த நடவடிக்கை எடுக்கப்பட்டுள்ளது.
இந்த நலன்புரி நிகழ்ச்சித்திட்டத்தை 2026 ஆம் ஆண்டின் மூன்றாவது பாடசாலை தவணை முடிவடைவதற்கு முன்னர் முழுமையாக நிறைவு செய்ய அரசாங்கம் திட்டமிட்டுள்ளது.இதற்கு முன்னர், அதாவது 2026 ஆம் ஆண்டுக்காகவும் இரண்டு வழிமுறைகள் ஊடாக நடைமுறைப்படுத்தப்பட்ட இதேபோன்ற காலணி விநியோகத் திட்டம் ஒன்றின் மூலம் தீவு முழுவதும் பரந்துள்ள 836,571 பாடசாலை மற்றும் பிரிவெனா மாணவர்கள் உள்ளடக்க நடவடிக்கை எடுக்கப்பட்டிருந்தது. அந்த ஆண்டில் நடைமுறைப்படுத்தப்பட்ட நிகழ்ச்சித்திட்டத்தின் முன்னேற்றம் மற்றும் வெற்றி நன்கு மீளாய்வு செய்யப்பட்டதன் பின்னர், புதிய ஆண்டின் நிகழ்ச்சித்திட்டத்தையும் மிகவும் முறையாக நடைமுறைப்படுத்துவதற்காக அமைச்சரவையின் இணக்கம் இவ்வாறு கிடைத்துள்ளது.
அதன்படி, மாகாண மட்டத்தில் வெவ்வேறு இரண்டு வழிமுறைகள் ஊடாக இந்த காலணி விநியோக நடவடிக்கைகள் மேற்கொள்ளப்படவுள்ளன. இதில் முதலாவது வழிமுறையின் கீழ் மேல், தென், சப்ரகமுவ, கிழக்கு மற்றும் வடமேல் மாகாண மாணவர்களுக்காக உள்ளூர் காலணி உற்பத்தியாளர்களிடமிருந்து நேரடியாக காலணிகளை கொள்வனவு செய்ய தீர்மானிக்கப்பட்டுள்ளதுடன், அந்த உற்பத்தியாளர்களால் சம்பந்தப்பட்ட காலணிகள் நேரடியாக பாடசாலைகளுக்கே கொண்டு வந்து ஒப்படைக்கப்படும். இதற்கு மேலதிகமாக மத்திய, வடக்கு, வடமத்திய மற்றும் ஊவா மாகாணங்களுக்காக முற்றிலும் வேறுபட்ட ஒரு வழிமுறை பின்பற்றப்படுவதுடன், அங்கு சம்பந்தப்பட்ட மாகாணங்களில் தெரிவு செய்யப்பட்ட பாடசாலை மாணவர்களுக்கு, பிரிவெனா இல்லற மற்றும் துறவற மாணவர்களுக்கும் சீலமாதாக்களுக்கும் சந்தையில் தமக்குத் தேவையான காலணிகளை கொள்வனவு செய்வதற்காக ஒருவருக்கு 3,000 ரூபா பெறுமதியான அன்பளிப்பு வவுச்சர்கள் வழங்க ஏற்பாடுகள் செய்யப்பட்டுள்ளன.