ஸ்ரீலங்கன் விமான நிறுவனத்தின் முன்னாள் பிரதம நிறைவேற்று அதிகாரி கபில சந்திரசேன உயிரிழந்த இடத்தில் கண்டுபிடிக்கப்பட்ட அடையாளம் தெரியாத மருந்து வகைகள் தொடர்பான அரசாங்க இரசாயன பகுப்பாய்வு அறிக்கையை விரைவாக கோர கோட்டை நீதவான் பசன் அமரசேன நடவடிக்கை எடுத்துள்ளார். அதன்படி, சம்பந்தப்பட்ட அறிக்கையை விரைவாக நீதிமன்றத்தில் சமர்ப்பிக்குமாறு கோரி நீதவான் நேற்று (08 ஆம் திகதி) அரசாங்க இரசாயன பகுப்பாய்வாளருக்கு விசேட நினைவூட்டலை அனுப்பினார்.
முன்னாள் சிரேஷ்ட கிரிக்கெட் வீரர் அரவிந்த டி சில்வாவின் வீட்டில் ஒரு அறையில் கண்டுபிடிக்கப்பட்ட இந்த அடையாளம் தெரியாத மருந்துகள் குறித்து இரசாயன பகுப்பாய்வுத் திணைக்களத்திடமிருந்து இதுவரை எந்த அறிக்கையும் கிடைக்கவில்லை என்று கொழும்பு குற்றப் பிரிவின் அதிகாரிகள் நீதிமன்றத்தில் தெரிவித்தனர். இந்த விடயங்களைக் கருத்தில் கொண்ட நீதவான் இந்த உத்தரவைப் பிறப்பித்தார்.
மேலும், இறந்தவருக்கான மரண பரிசோதனை அறிக்கை இதுவரை தங்களுக்கு கிடைக்கவில்லை என்று கொழும்பு குற்றப் பிரிவின் அதிகாரிகள் நீதிமன்றத்தில் மேலும் தெரிவித்தனர். அதன்படி, அந்த மரண பரிசோதனை அறிக்கையை உடனடியாக சமர்ப்பிக்குமாறு கோரி கொழும்பு சட்ட வைத்திய அதிகாரி அலுவலகத்திற்கு நினைவூட்டல் கடிதம் ஒன்றை அனுப்புமாறு நீதவான் உத்தரவிட்டார். இந்த விசாரணைகளின் முன்னேற்றம் குறித்து ஆராய சம்பந்தப்பட்ட வழக்கு இந்த மாதம் 22 ஆம் திகதி மீண்டும் விசாரணைக்கு எடுத்துக்கொள்ளப்படும்.
ஸ்ரீலங்கன் விமான நிறுவனத்திற்கு ஏர்பஸ் ரக விமானங்களை கொள்வனவு செய்யும் கொடுக்கல்வாங்கலில் 20 இலட்சம் அமெரிக்க டொலர் இலஞ்சம் பெற்ற குற்றச்சாட்டில் விளக்கமறியலில் வைக்கப்பட்டிருந்த கபில சந்திரசேனவை 2026 மே மாதம் 06 ஆம் திகதி பிணையில் விடுவிக்க நீதிமன்றம் உத்தரவிட்டிருந்தது. இருப்பினும், பிணையாளர்கள் தொடர்பான சிக்கலான நிலைமை காரணமாக, மே மாதம் 07 ஆம் திகதி அவரை மீண்டும் கைது செய்ய உத்தரவிடப்பட்டதுடன், மறுநாள் அதாவது மே மாதம் 08 ஆம் திகதி கொழும்பு கொள்ளுப்பிட்டி பிரதேசத்தில் அமைந்துள்ள முன்னாள் சிரேஷ்ட கிரிக்கெட் வீரர் அரவிந்த டி சில்வாவின் வீட்டில் ஒரு அறையில் அவர் உயிரிழந்த நிலையில் கண்டுபிடிக்கப்பட்டார்.