அவுஸ்திரேலியாவில் வேலைவாய்ப்புகளை வழங்குவதாகக் கூறி ஒரு கோடி ரூபாய்க்கும் அதிகமான நிதி மோசடி செய்த இந்நாட்டின் பிரபல தனியார் தொலைக்காட்சி அலைவரிசையின் விற்பனை நிர்வாகி ஒருவர் இலங்கை வெளிநாட்டு வேலைவாய்ப்புப் பணியகத்தின் விசாரணைப் பிரிவின் பொலிஸ் பிரிவினரால் கைது செய்யப்பட்டுள்ளார். கடந்த 2026 ஜூலை 15 ஆம் திகதி அவிசாவளைப் பிரதேசத்தில் இந்த கைது இடம்பெற்றுள்ளது.
சந்தேகநபர் நாட்டின் பல்வேறு பகுதிகளில் வசிக்கும் மக்களை ஏமாற்றி, அவுஸ்திரேலிய வேலைவாய்ப்பு கனவைக் காட்டி, ஒருவரிடம் இருந்து 25 லட்சம் முதல் 35 லட்சம் ரூபா வரையான பணத்தை மோசடியாகப் பெற்றுள்ளமை விசாரணைகளில் தெரியவந்துள்ளது. அதன்படி, அவர் பல்வேறு நபர்களிடம் இருந்து மோசடி செய்த மொத்தப் பணம் ஒரு கோடி ரூபாயைத் தாண்டும் என குறிப்பிடப்பட்டுள்ளது.
இந்த நிதி மோசடியில் சம்பந்தப்பட்ட நபருக்கு எதிராக வெளிநாட்டு வேலைவாய்ப்புப் பணியகத்தின் விசேட விசாரணைப் பிரிவுக்கு 8 முறைப்பாடுகள் கிடைத்துள்ளன. சந்தேகநபரை கைது செய்ய அதிகாரிகள் இதற்கு முன்னர் பல சந்தர்ப்பங்களில் முயற்சி செய்த போதிலும், அவர் விசாரணை அதிகாரிகளைத் தவிர்த்து சூட்சுமமாக மறைந்திருந்துள்ளார். பின்னர் விசாரணை அதிகாரிகளால் அனுப்பப்பட்ட ஒரு தந்திரோபாய முகவர் மூலம், வெளிநாட்டு வேலை தேவை என்று கூறி சந்தேகநபரை தொடர்பு கொள்ள நடவடிக்கை எடுக்கப்பட்டுள்ளது. அதன்படி, அவிசாவளை நகரில் தங்கியிருந்த சந்தேகநபரை பெரும் பிரயத்தனத்தின் பின்னர் அதிகாரிகள் சுற்றிவளைத்துப் பிடித்தனர்.
வெளிநாட்டு வேலைவாய்ப்புப் பணியகத்தின் செல்லுபடியான அனுமதிப்பத்திரம் இன்றி வெளிநாட்டு வேலைகளுக்கு ஆட்சேர்ப்பு செய்தமை மற்றும் நிதி மோசடி செய்தமை ஆகிய குற்றச்சாட்டுகளின் கீழ் சந்தேகநபருக்கு எதிராக அவிசாவளை நீதவான் நீதிமன்றத்தில் 8 வழக்குகள் தாக்கல் செய்யப்பட்டுள்ளன. கைது செய்யப்பட்ட இந்த விற்பனை நிர்வாகி ஜூலை 16 ஆம் திகதி அவிசாவளை நீதவான் நீதிமன்றத்தில் ஆஜர்படுத்தப்பட்ட பின்னர், எதிர்வரும் ஜூலை மாதம் 30 ஆம் திகதி வரை விளக்கமறியலில் வைக்க நீதவான் உத்தரவிட்டுள்ளார்.