பாணந்துறை வடக்கு பொலிஸ் பிரிவுக்குட்பட்ட கொரகானா, கல்கனுவ வீதிப் பிரதேசத்திலுள்ள வாடகை வீட்டில் இருந்து யுவதியொருவரின் சடலத்தை பொலிஸார் கண்டுபிடித்துள்ளனர். கத்தியால் கழுத்து வெட்டப்பட்டு கொலை செய்யப்பட்டதாக சந்தேகிக்கப்படும் இந்த சடலம், அந்த வீட்டிலிருந்து வெளியான கடும் துர்நாற்றம் காரணமாக பிரதேசவாசிகளும் பொலிஸாரும் இணைந்து கதவை உடைத்து சோதனை செய்தபோது கண்டெடுக்கப்பட்டுள்ளது.
இவ்வாறு துரதிர்ஷ்டவசமாக உயிரிழந்தவர், தனியார் பல்கலைக்கழகத்தில் சட்டப் பட்டம் படித்து வந்த மான்னமரக்களகே நதுனி சஷ்சரி குரே என்ற 26 வயது யுவதியாவார். இவர் இதற்கு முன்னர் மொரட்டுவ பிரதேசத்தில் வசித்து வந்துள்ளார் என்றும், தனியார் நிறுவனமொன்றில் உயர் பதவியில் இருந்த ஒருவரை திருமணம் செய்து பின்னர் அவரிடமிருந்து விவாகரத்து பெற்றவர் என்றும் ஆரம்பகட்ட பொலிஸ் விசாரணைகளில் தெரியவந்துள்ளது. அவர் தனது சட்டப் படிப்புடன் மேலதிக பயிற்சியாக ஒரு சட்டத்தரணியின் கீழ் நீதிமன்ற நடவடிக்கைகளிலும் ஈடுபட்டு வந்துள்ளார்.
உயிரிழந்த யுவதி குறித்த வாடகை வீட்டில் தனியாக வசித்து வந்துள்ளார். சுமார் இரண்டு நாட்களாக அவரைப் பற்றிய எந்த தகவலையும் அவரது குடும்ப உறுப்பினர்களால் பெற முடியவில்லை. செல்ல நாய்களை வளர்ப்பதில் மிகுந்த ஆர்வம் கொண்ட அவர் உயிரிழந்திருந்த அறையில் ஐந்து சிறிய நாய்கள் இருந்ததாகவும் தெரிவிக்கப்பட்டுள்ளது. சடலம் கண்டெடுக்கப்பட்டபோது, கொலைக்கு பயன்படுத்தப்பட்டதாக சந்தேகிக்கப்படும் இரண்டு கத்திகளும் சடலத்திற்கு அருகில் கிடந்த நிலையில் பொலிஸாரால் கைப்பற்றப்பட்டுள்ளன.
இந்த மர்ம மரணம் தற்கொலையா அல்லது வேறு ஏதேனும் குற்றச் செயல் காரணமாக நடந்ததா என்பது குறித்து இதுவரை உறுதியான முடிவுக்கு வரப்படவில்லை. இது குறித்த உண்மையான தகவல்களை வெளிக்கொணர்வதற்காக பாணந்துறை வடக்கு பொலிஸார் விரிவான விசாரணைகளை ஆரம்பித்துள்ளனர். பாணந்துறைப் பிரிவு குற்றவியல் தடயவியல் ஆய்வக அதிகாரிகள் மற்றும் கைரேகை அதிகாரிகள் ஏற்கனவே சம்பவ இடத்தில் விசாரணைகளை மேற்கொண்டுள்ளனர். பாணந்துறை நீதவான் விசாரணையும் விரைவில் நடத்தப்படவுள்ளது.
பாணந்துறை சிரேஷ்ட பொலிஸ் அத்தியட்சகர் நிஷான் சில்வா மற்றும் உதவி பொலிஸ் அத்தியட்சகர் கமல் ஜயநேத்தி ஆகியோரின் நேரடி உத்தரவின் பேரில், பாணந்துறை வடக்கு பொலிஸ் நிலைய பொறுப்பதிகாரி பிரதான பொலிஸ் பரிசோதகர் திஸ்ஸ சரத்சந்திரவின் வழிகாட்டலின் கீழ் இந்த விசாரணைகள் முன்னெடுக்கப்படுகின்றன. குற்றப் பிரிவின் பொறுப்பதிகாரி உப பொலிஸ் பரிசோதகர் அசோக நாமல் உள்ளிட்ட அதிகாரிகள் குழுவினர் சம்பவம் தொடர்பில் மேலதிக விசாரணைகளை மேற்கொண்டு வருகின்றனர்.
