போக்குவரத்து, நெடுஞ்சாலைகள் மற்றும் நகர அபிவிருத்தி அமைச்சர் பிமல் ரத்நாயக்க இன்று பாராளுமன்றத்தில் தெரிவிக்கையில், திட்டமிடப்பட்ட இலகு ரயில் போக்குவரத்து (LRT) திட்டம் தொடர்ந்து செயல்பட வாய்ப்பில்லை என்றார். இந்த திட்டம் தொடர்பாக அரசாங்கம் ஒரு விசேட ஆய்வை மேற்கொண்டுள்ளதுடன், அதற்கான அதிக செலவு மற்றும் அதனால் சேவை பெறும் பயணிகளின் எண்ணிக்கை குறைவாக இருப்பதன் காரணமாக இந்த நடவடிக்கை எடுக்கப்பட்டுள்ளது.
இந்த விடயங்களைக் கருத்தில் கொள்ளும்போது, இலகு ரயில் திட்டம் நடைமுறைக்கு சாத்தியமற்றது மற்றும் வெற்றியடையாத ஒன்று என அரசாங்கம் தீர்மானித்துள்ளது. இதன் காரணமாக, பயணிகள் போக்குவரத்துக்காக இதைவிட பொருளாதார ரீதியாக இலாபகரமான மற்றும் பயனுள்ள ஒரு மாற்று வழியான மெட்ரோ பஸ் (Metro Bus) திட்டம் போன்ற வழிமுறைகள் மீது அரசாங்கத்தின் கவனம் செலுத்தப்பட்டு வருவதாகவும் அமைச்சர் மேலும் குறிப்பிட்டார்.இது தவிர, மத்திய அதிவேக நெடுஞ்சாலையின் கட்டுமானப் பணிகள் தற்போது கலாகெதரவில் முடிவடைய ஏற்பாடு செய்யப்பட்டுள்ளதுடன், எதிர்காலத்தில் அந்த வீதியை கன்னோருவா வரை நீடிப்பதற்கான தெளிவான திட்டங்களுடன் இது செய்யப்படுவதாக அமைச்சர் வெளிப்படுத்தினார். இன்று பாராளுமன்றத்தில் பாராளுமன்ற உறுப்பினர் அனுராத ஜயரத்ன எழுப்பிய சில கேள்விகளுக்கு பதிலளிக்கும்போது அமைச்சர் இதைத் தெரிவித்தார். அத்துடன், கண்டி நகரை மையமாகக் கொண்டு மேலும் பல வீதி அபிவிருத்திப் பணிகள் எதிர்காலத்தில் மேற்கொள்ள திட்டமிடப்பட்டுள்ளதாகவும் அவர் சபைக்கு அறிவித்தார்.
பல்வேறு காரணங்களால் சேதமடைந்துள்ள கொழும்பு - கண்டி பிரதான மலையக ரயில் பாதையின் புனரமைப்புப் பணிகள் குறித்தும் அமைச்சர் இங்கு கருத்து தெரிவித்தார். அதன்படி, தற்போது தடைபட்டுள்ள அந்த ரயில் பாதையின் கட்டுமானப் பணிகள் இந்த ஆண்டின் இறுதியில் அல்லது 2027 ஆம் ஆண்டின் முதல் இரண்டு மாதங்களுக்குள் நிறைவு செய்ய எதிர்பார்க்கப்படுவதாக அமைச்சர் பிமல் ரத்நாயக்க மேலும் தெரிவித்தார்.