கடுவெல, கொரதொட்ட பிரதேசத்தில் வசிக்கும் 13 வயது சிறுவன் ஒருவன் சைக்கிளில் இருந்து விழுந்து ஏற்பட்ட விபத்து குறித்து வீட்டிற்கு தெரிவிக்காமல் இருந்த நிலையில், மருத்துவமனையில் அனுமதிக்கப்பட்டபோது துரதிர்ஷ்டவசமாக உயிரிழந்துள்ளதாக நவ்கமுவ பொலிஸார் தெரிவித்தனர். பொழுதுபோக்கிற்காக சைக்கிள் ஓட்டிக்கொண்டிருந்தபோது ஏற்பட்ட இந்த விபத்தில் உயிரிழந்தவர் ஒரே குடும்பத்தைச் சேர்ந்த இரட்டை சகோதரர்களில் மூத்தவர் ஆவார். அவர் ஒருவல மாவட்ட மருத்துவமனையில் அனுமதிக்கப்பட்ட பின்னர் உயிரிழந்துள்ளார்.
உயிரிழந்த சிறுவனும் அவனது இரட்டை இளைய சகோதரனும் ஓய்வு நேரத்தில் கைப்பிடி சுழலும் வகையில் பொருத்தப்பட்டிருந்த விசேட சைக்கிள்களை ஓட்டிப் பழகியுள்ளனர். தாயார் இந்த ஆபத்தான சைக்கிள் ஓட்டத்தை தொடர்ந்து எதிர்த்த போதிலும், அவருக்குத் தெரியாமல் கடந்த 30ஆம் திகதி மாலை கரதொட்ட வக்கவத்த வீதியில் இருவரும் சைக்கிள் ஓட்டிக்கொண்டிருந்தனர். அப்போது முன்னால் சென்ற மூத்த சகோதரனின் சைக்கிள் திடீரென சறுக்கி விழுந்ததை பின்னால் வந்த இளைய சகோதரன் பார்த்துள்ளான்.
விபத்துக்குப் பிறகு, இளைய சகோதரன் வந்து விழுந்து கிடந்த மூத்த சகோதரனை எழுப்பி, சைக்கிளையும் கொடுத்துவிட்டு வீட்டிற்குச் சென்றுள்ளதாக ஆரம்பகட்ட விசாரணைகளில் தெரியவந்துள்ளது. இருப்பினும், நடந்த விபத்து குறித்து பெற்றோரிடம் குழந்தை தெரிவிக்கவில்லை, அன்றைய இரவு உணவையும் கூட மறுத்துவிட்டான். பின்னர் மறுநாள் காலை குழந்தை கடுமையான வயிற்று வலியால் அவதிப்படுவதாகக் கூறியதையடுத்து, பெற்றோர்கள் அவனை ஒருவல மாவட்ட மருத்துவமனையில் அனுமதித்த போதிலும், அதற்குள்ளாகவே அவன் உயிரிழந்துவிட்டான் என்று மருத்துவர்கள் உறுதிப்படுத்தியுள்ளனர்.
சைக்கிளின் கைப்பிடி குழந்தையின் வயிற்றுப் பகுதியில் பலமாக குத்தியதால் ஏற்பட்ட உள் காயங்களே இந்த மரணத்திற்கு காரணமாக இருக்கலாம் என பொலிஸார் சந்தேகிக்கின்றனர். இச்சம்பவம் தொடர்பில் தலங்கம திடீர் மரண விசாரணை அதிகாரி, சமாதான நீதவான் திருமதி பிரேமலதா அபேவர்தன சம்பவ இடத்திற்குச் சென்று விசாரணை நடத்தியுள்ளார்.