உண்டியால் முறைமையின் கீழ் அமெரிக்க டொலர் பில்லியன்கள் கணக்கான பணத்தை சட்டவிரோதமாக நாட்டிலிருந்து வெளியே அனுப்பிய சம்பவம் தொடர்பில் கைது செய்யப்பட்ட 4 தனியார் வங்கி முகாமையாளர்கள் குறித்து அமைச்சரவைப் பேச்சாளர் அமைச்சர் வைத்தியர் நளிந்த ஜயதிஸ்ஸ இன்று (18) பல விடயங்களை வெளிப்படுத்தினார்.
அவர் அமைச்சரவை முடிவுகளை அறிவிக்கும் ஊடகவியலாளர் சந்திப்பில் இவ்வாறு தெரிவித்தார்.
அங்கு கருத்து தெரிவித்த அமைச்சர், இந்த நான்கு முகாமையாளர்களும் 10,151 சந்தர்ப்பங்களில் 89 கணக்குகள் மூலம் சட்டவிரோதமாக பணத்தை அனுப்பியுள்ளதாக தற்போது தெரியவந்துள்ளதாக தெரிவித்தார்.
இந்த ஆண்டு ஜனவரி மாதம் சுங்கத் திணைக்களத்தின் மேலதிக பணிப்பாளர் நாயகத்தால் நிதி மோசடி விசாரணைப் பிரிவிடம் செய்யப்பட்ட முறைப்பாட்டின் அடிப்படையில் விசாரணை ஆரம்பிக்கப்பட்டதாக தெரிவித்த அமைச்சர், அதன்படி கடந்த ஜூன் 19ஆம் திகதி நீர்கொழும்பு பிரதேசத்தில் ஒருவர் கைது செய்யப்பட்டதாகவும் குறிப்பிட்டார்.
அங்கு மேற்கொள்ளப்பட்ட மேலதிக விசாரணைகளின் விளைவாக இந்த நான்கு வங்கி முகாமையாளர்களும் கைது செய்யப்பட்டதாகவும், சந்தேகநபர்கள் தொடர்பில் பணச் சலவைச் சட்டம் மற்றும் தண்டனைச் சட்டக்கோவையின் கீழ் நீதிமன்றத்திற்கு விடயங்கள் அறிக்கையிடப்பட்டு வருவதாகவும் அமைச்சர் குறிப்பிட்டார்.
அங்கு இது தொடர்பில் மேலும் கருத்து தெரிவித்த அமைச்சர் வைத்தியர் நளிந்த ஜயதிஸ்ஸ,
"2026 ஜனவரி மாதம் சுங்கத் திணைக்களத்தின் மேலதிக பணிப்பாளர் நாயகத்தால் FCID இற்கு செய்யப்பட்ட முறைப்பாட்டின் அடிப்படையில் விசாரணை நடவடிக்கைகள் ஆரம்பிக்கப்பட்டன. கொழும்பு பிரதான நீதவான் நீதிமன்றத்திற்கு விடயங்கள் அறிக்கையிடப்பட்டபோது, 210 கணக்குகள் தொடர்பான தகவல்களை வெளிப்படுத்த நீதிமன்ற அனுமதி கிடைத்துள்ளது. அந்த விசாரணையின்போது 2026-06-19 அன்று நீர்கொழும்பில் ஒருவர் கைது செய்யப்பட்டார். அவருக்கு 7 நாட்கள் தடுப்புக் காவல் உத்தரவு வழங்கப்பட்டு தற்போது விளக்கமறியலில் வைக்கப்பட்டுள்ளார். 89 கணக்குகள் மூலம் 10,151 சந்தர்ப்பங்களில் பணம் அனுப்பப்பட்டுள்ளது. நாட்டிலிருந்து வெளியேற்றப்பட்ட மொத்தப் பணத்தின் பெறுமதி 74 பில்லியன் ரூபாவாகும். அந்த விசாரணைகளின் விளைவாகவே இந்த 4 தனியார் வங்கிகளின் முகாமையாளர்கள் உள்ளிட்ட 4 நிறைவேற்று அதிகாரிகள் கைது செய்யப்பட்டு விசாரணைகள் முன்னெடுக்கப்பட்டு வருகின்றன. இவர்களுக்கு எதிராக பணச் சலவைச் சட்டம் மற்றும் தண்டனைச் சட்டக்கோவையின் கீழ் நீதிமன்றத்திற்கு விடயங்கள் அறிக்கையிடப்பட்டு வருகின்றன. இது டெலிகிராபிக் பரிமாற்றம் (Telegraphic Transfer) மூலம் மேற்கொள்ளப்பட்டுள்ளது."