நேபாளம் மற்றும் திபெத் எல்லைப் பகுதிகளில் உள்ள பள்ளத்தாக்குகளை பெரும் அழிவுக்கு உள்ளாக்கிய, 2026 ஆகஸ்ட் 26 அன்று ஏற்பட்ட திடீர் மண் மற்றும் வெள்ளப்பெருக்கின் போது, நுவாகோட் மாவட்டத்தில் அமைந்துள்ள ஒரு இருமாடி வீடு அதிசயமாக சேதமடையாமல் நின்ற செய்தி உலகளவில் பெரும் கவனத்தை ஈர்த்துள்ளது. சுற்றியிருந்த அனைத்து கட்டிடங்களும் கடுமையான வெள்ளத்தில் அடித்துச் செல்லப்பட்ட நிலையில், வெளிர் பச்சை மற்றும் வெள்ளை நிறத்திலான இந்த வீட்டின் இரண்டாம் மாடி பால்கனியில் தங்கியிருந்த குடும்பத்தினர், மீட்புப் படையினர் வரும் வரை உயிர் பிழைத்திருந்தனர்.
அந்தச் சம்பவத்தைக் காட்டும் வீடியோ காட்சிகள் சமூக ஊடகங்களில் வேகமாகப் பரவியதுடன், பின்னர் மேற்கொள்ளப்பட்ட மீட்பு நடவடிக்கைகளில் அங்கு இருந்தவர்கள் பாதுகாப்பாக மீட்கப்பட்டுள்ளனர்.சுற்றியுள்ள அனைத்து கட்டிடங்களும் இடிபாடுகளாக மாறிய நிலையில், இந்த பச்சை நிற வீடு மட்டும் பாதுகாப்பாக நின்றது குறித்து பொறியியல் துறையிலும் சமூக ஊடகங்களிலும் பல்வேறு கருத்துகள் முன்வைக்கப்பட்டு வருகின்றன. அதன் உறுதியான கான்கிரீட் தூண்கள் மற்றும் அடித்தளம், வீடு அமைந்துள்ள இடத்தின் உயரம், அத்துடன் மற்ற கட்டிடங்களால் வெள்ளத்தின் வேகம் குறைக்கப்பட்டமை போன்ற காரணிகள் இதற்குப் பங்களித்திருக்கலாம் என்று நம்பப்படுகிறது. இருப்பினும், இத்தகைய கடுமையான வெள்ளப்பெருக்கை ஒரு கட்டிடம் தாங்கி நின்றது ஒரு அரிய அதிர்ஷ்டகரமான நிகழ்வாகவே பலரால் கருதப்படுகிறது.
இந்த திடீர் வெள்ளப்பெருக்கினால் நேபாளத்தின் ரசுவா மற்றும் நுவாகோட் மாவட்டங்களில் உள்ள பல கிராமங்கள் மண் மேடுகளால் மூடப்பட்டன, மேலும் நீர்மின் திட்டங்கள், பாலங்கள் மற்றும் சாலைகள் முற்றிலும் அழிந்து போயின. ஆகஸ்ட் 29 ஆம் தேதி வெளியிடப்பட்ட உத்தியோகபூர்வ அறிக்கைகளின்படி, இறந்தவர்களின் எண்ணிக்கை 600 ஐத் தாண்டியுள்ளதோடு, சுற்றுலாப் பயணிகள் மற்றும் யாத்ரீகர்கள் உட்பட 1,900 க்கும் மேற்பட்டோர் காணாமல் போயுள்ளனர். 2015 ஆம் ஆண்டு ஏற்பட்ட பூகம்பத்திற்குப் பிறகு நேபாளம் எதிர்கொண்ட மிக மோசமான இயற்கை பேரழிவாக இது கருதப்படுவதுடன், திபெத் பகுதியிலும் கடுமையான சேதங்கள் ஏற்பட்டுள்ளன.
இந்த வீட்டின் குடும்பத்தினரைத் தவிர, நுவாகோட் பகுதியில் மேலும் பல உயிர் பிழைத்தவர்களின் செய்திகள் பதிவாகியுள்ளன. தனது முழு குடும்பமும் வெள்ளத்தில் சிக்கியபோது, தனது சிறிய மகனின் கையைப் பிடித்துக்கொண்டு ஒரு கூரையில் தங்கியிருந்த கல்பனா மல்லா என்ற பெண், உயிர் பிழைக்க மாமரத்தில் தொங்கிய 24 வயது பிபேக் குமார் மற்றும் பள்ளியில் இருந்து தப்பித்து மரத்தில் ஏறி உயிர் பிழைத்த 8 வயது சோயல் காலே என்ற சிறுவன் ஆகியோர் அவர்களில் அடங்குவர். மேலும், வெள்ளத்தில் மூழ்கிய ஒரு முதியோர் இல்லத்தில் இருந்து 90 வயதுக்கும் மேற்பட்ட ஒரு மூதாட்டியை மட்டும் மீட்புக் குழுவினர் பாதுகாப்பாக மீட்க முடிந்தது.
