அரசியலமைப்பின் 22வது திருத்தச் சட்டமூலம் மற்றும் நீதித்துறை அமைப்பு (திருத்தம்) சட்டமூலம் ஆகியவற்றுக்கு சபாநாயகர் வைத்தியர் ஜகத் விக்ரமரத்ன இன்று (25) தனது சான்றிதழை வழங்கினார். நேற்று (24) மற்றும் இன்று ஆகிய இரு நாட்களிலும் நடைபெற்ற நீண்ட விவாதத்திற்குப் பின்னர் இடம்பெற்ற வாக்கெடுப்பில், 22வது அரசியலமைப்புத் திருத்தச் சட்டமூலத்தின் மூன்றாம் வாசிப்பு திருத்தங்களுடன் விசேட பெரும்பான்மையுடன் நிறைவேற்றப்பட்டது.
இதன்போது சட்டமூலத்திற்கு ஆதரவாக 158 வாக்குகள் கிடைத்தன. அதற்கு எதிராக 63 வாக்குகள் மட்டுமே கிடைத்தன. எந்தவொரு பாராளுமன்ற உறுப்பினரும் வாக்களிப்பில் இருந்து விலகியிருக்கவில்லை. அதன்படி, குறித்த சட்டமூலம் 95 மேலதிக வாக்குகளால் பாராளுமன்றத்தில் நிறைவேற்றப்பட்டது.இவ்வாறு அமுலுக்கு வந்த இருபத்தி இரண்டாவது அரசியலமைப்புத் திருத்தத்தின் மூலம், இந்நாட்டின் நீதித்துறை அமைப்பில் உள்ள சிரேஷ்ட நீதிபதிகளின் ஓய்வு பெறும் வயது வரம்புகள் அதிகரிக்கப்பட்டுள்ளன. அதன்படி, உச்ச நீதிமன்ற நீதிபதிகளின் ஓய்வு பெறும் வயது 65 இல் இருந்து 67 ஆகவும், மேன்முறையீட்டு நீதிமன்ற நீதிபதிகளின் ஓய்வு பெறும் வயது 63 இல் இருந்து 65 ஆகவும் அதிகரிக்கப்பட்டுள்ளது. அத்துடன், அரசியலமைப்பின் 137வது பிரிவைத் திருத்துவதன் மூலம் மேன்முறையீட்டு நீதிமன்ற நீதிபதிகளின் எண்ணிக்கையை 19 இல் இருந்து 24 ஆக அதிகரிக்கவும் நடவடிக்கை எடுக்கப்பட்டுள்ளது. பிராந்திய ரீதியாக மேன்முறையீட்டு நீதிமன்றங்களை ஸ்தாபிப்பதன் மூலம் விசாரணையில் உள்ள வழக்குகளை விரைவாக முடிப்பதும், வழக்குகளுடன் தொடர்புடைய தரப்பினருக்கு கொழும்புக்கு வர நேரிடும் அசௌகரியத்தைக் குறைப்பதும் இந்தத் திருத்தத்தின் முக்கிய நோக்கமாகும்.
அத்துடன், பாராளுமன்றத்தில் மேலதிக வாக்குகளால் நிறைவேற்றப்பட்ட நீதித்துறை அமைப்பு (திருத்தம்) சட்டமூலம், 2026 ஆம் ஆண்டின் 23 ஆம் இலக்க நீதித்துறை அமைப்பு (திருத்தம்) சட்டமாக அமுலுக்கு வந்துள்ளது. இந்த புதிய சட்டத்தின் கீழ், உயர் நீதிமன்ற நீதிபதிகளின் ஓய்வு பெறும் வயது 61 இல் இருந்து 63 ஆகவும், மாவட்ட நீதிபதிகள் மற்றும் நீதவான்களின் ஓய்வு பெறும் வயது 60 இல் இருந்து 62 ஆகவும் நீடிக்கப்பட்டுள்ளது. நீதித்துறை அமைப்புச் சட்டத்தின் 4வது பிரிவில் மேற்கொள்ளப்பட்ட திருத்தங்களின் மூலம், மேலதிக மாகாண உயர் நீதிமன்றங்கள் மற்றும் மாகாண சிவில் மேன்முறையீட்டு உயர் நீதிமன்றங்களை ஸ்தாபிக்கக்கூடிய வகையில், உயர் நீதிமன்ற நீதிபதிகளின் அதிகபட்ச எண்ணிக்கையை 110 இல் இருந்து 120 ஆக அதிகரிக்க ஏற்பாடுகள் செய்யப்பட்டுள்ளன.