டிஜிட்டல் பொருளாதார அமைச்சு மற்றும் SLT-Mobitel நிறுவனம் இணைந்து ஏற்பாடு செய்யும் "2026 இலங்கை செயற்கை நுண்ணறிவு வாரம்" (Sri Lanka AI Week 2026) செப்டம்பர் 25 முதல் 30 ஆம் திகதி வரை நடத்த ஏற்பாடுகள் செய்யப்பட்டுள்ளன. கொழும்பு நகரை மையமாகக் கொண்டு நடைபெறும் இந்த விசேட நிகழ்ச்சி, நாட்டின் தொழில்நுட்ப வரலாற்றில் ஏற்பாடு செய்யப்படும் மிகப்பெரிய செயற்கை நுண்ணறிவுத் திருவிழாவாக வரலாற்றில் இடம்பிடிக்கும் என்பதுடன், இதன் மூலம் இலங்கையின் செயற்கை நுண்ணறிவுத் திறன் குறிப்பிடத்தக்க அளவில் மேம்படுத்தப்படும் என எதிர்பார்க்கப்படுகிறது.
உலகப் புகழ்பெற்ற செயற்கை நுண்ணறிவுத் தலைவர்கள், தொழில்நுட்பத் துறை வல்லுநர்கள், கொள்கை வகுப்பாளர்கள், புதுமையாளர்கள் மற்றும் பல வணிகத் தலைவர்கள் எனப் பலரையும் ஒரே மேடைக்குக் கொண்டு வரும் இந்த பிரமாண்டமான நிகழ்ச்சி ஐந்து முக்கிய நிகழ்வுகளைக் கொண்டுள்ளது. அதன்படி, AI ஹேக்கத்தான் போட்டி, AI தலைவர்களின் இரவு, AI மாநாடு, AI கண்காட்சி மற்றும் தேசிய AI விருதுகள் விழா எனப் பல அம்சங்கள் வெற்றிகரமாக நடத்தப்படவுள்ளன.
இந்த வாரத்தின் முக்கிய நிகழ்வுகளில் ஒன்றான செயற்கை நுண்ணறிவு மாநாடு செப்டம்பர் 29 மற்றும் 30 ஆகிய இரு தினங்களிலும் கொழும்பு மொனார்க் இம்பீரியல் வளாகத்தில் நடைபெறும். உலகெங்கிலும் உள்ள 16க்கும் மேற்பட்ட நாடுகளைப் பிரதிநிதித்துவப்படுத்தி, துறையின் 60க்கும் மேற்பட்ட வல்லுநர்கள் இதில் கருத்து தெரிவிக்கவுள்ளனர். Google, Huawei, ZTE, Deloitte மற்றும் Alibaba போன்ற உலகளாவிய தொழில்நுட்ப ஜாம்பவான்களின் பிரதிநிதிகளும் இதில் கலந்துகொள்வார்கள். உலகளாவிய ரீதியில் நடைபெறும் சமீபத்திய AI மேம்பாடுகள் மற்றும் அவை இலங்கை வணிகங்கள் மற்றும் ஒட்டுமொத்த பொருளாதாரத்தை எவ்வாறு பாதிக்கின்றன என்பது குறித்து இங்கு விரிவாக விவாதிக்கப்படும். www.aiexpo.lk இணையதளம் மூலமாகவோ அல்லது PickMe மற்றும் OneTicket செயலிகள் மூலமாகவோ அதற்கான நுழைவுச்சீட்டுகளைப் பெற்றுக்கொள்ளலாம்.
மாநாட்டிற்கு இணையாக ஏற்பாடு செய்யப்பட்டுள்ள சிறப்பு AI கண்காட்சி, சம்பந்தப்பட்ட நாட்களில் காலை 8.00 மணி முதல் இரவு 8.00 மணி வரை பொதுமக்களுக்காக முற்றிலும் இலவசமாக திறந்திருக்கும். அதிநவீன செயற்கை நுண்ணறிவு தொழில்நுட்பங்கள் மற்றும் புதுமைகளை காட்சிப்படுத்தும் 35க்கும் மேற்பட்ட நிறுவனங்களின் பங்கேற்புடன் நடைபெறும் இந்த கண்காட்சியின் முக்கிய நோக்கம், உலகின் சமீபத்திய தொழில்நுட்ப கருவிகளை இலங்கை மக்களுக்கு நெருக்கமாக அறிமுகப்படுத்துவதும், அவற்றை அனுபவிக்க வழிவகுப்பதுமாகும்.