22ஆவது அரசியலமைப்புத் திருத்தச் சட்டமூலத்தை நிறைவேற்றுவதற்கு சர்வஜன வாக்கெடுப்பு நடத்த வேண்டிய அவசியம் இல்லை என உயர் நீதிமன்றம் தீர்ப்பளித்துள்ளது. அதன்படி, குறித்த சட்டமூலத்தை பாராளுமன்றத்தில் மூன்றில் இரண்டு பெரும்பான்மை வாக்குகளால் மாத்திரம் நிறைவேற்ற முடியும் என சபாநாயகர் வைத்தியர் ஜகத் விக்கிரமரத்ன இன்று (22) பாராளுமன்றத்திற்கு அறிவித்தார்.
இன்று பாராளுமன்றக் கூட்டத்தொடரின் ஆரம்பத்தில் உயர் நீதிமன்றத்திடமிருந்து பெறப்பட்ட இந்த விசேட விளக்கத்தை சபைக்கு சமர்ப்பித்த சபாநாயகர், அரசியலமைப்பின் 83ஆவது சரத்தின் ஏற்பாடுகளின்படி, மக்களின் சர்வஜன வாக்கெடுப்பு அங்கீகாரம் இல்லாமலேயே இந்த திருத்தத்தை நிறைவேற்றுவதற்கு ஏற்பாடுகள் உள்ளதாக சுட்டிக்காட்டினார். 22ஆவது அரசியலமைப்புத் திருத்தம் அரசியலமைப்பிற்கு இணங்குகிறது என்பதை உயர் நீதிமன்றம் உறுதிப்படுத்தியுள்ளதாகவும் அவர் குறிப்பிட்டார்.
உயர் நீதிமன்ற நீதிபதிகளின் ஓய்வு பெறும் வயதை தற்போதுள்ள 65இல் இருந்து 67 ஆகவும், மேன்முறையீட்டு நீதிமன்ற நீதிபதிகளின் ஓய்வு பெறும் வயதை 63இல் இருந்து 65 ஆகவும் நீடிப்பது உள்ளிட்ட பல விடயங்களை அடிப்படையாகக் கொண்டு இந்த 22ஆவது அரசியலமைப்புத் திருத்தச் சட்டமூலம் பாராளுமன்றத்தில் சமர்ப்பிக்கப்பட்டது.
அரசியலமைப்பின் 121(1) சரத்தின் கீழ் உயர் நீதிமன்றத்தில் சவால் செய்யப்பட்ட இந்த வரைவுச் சட்டமூலத்தை ஆராய்ந்த நீதிபதிகள் குழாம், அதன் சில சரங்களில் உள்ள சொற்கள் திருத்தப்பட வேண்டிய விதத்தையும் தீர்ப்பின் மூலம் சுட்டிக்காட்டியுள்ளது. அத்துடன், இந்தச் சட்டம் அமுலுக்கு வரும் திகதியில் பிரதம நீதியரசர் பதவியை வகிக்கும் நபருக்குப் பொருந்தும் வகையில் விதிக்கப்பட்டுள்ள நிபந்தனைகள் தொடர்பாகவும் உயர் நீதிமன்றம் தனது முடிவில் கருத்துத் தெரிவித்துள்ளது.
இது தவிர, குறித்த திருத்தத்திற்கு இணையாக சபையில் சமர்ப்பிக்கப்பட்ட நீதித்துறை அமைப்பு (திருத்த) சட்டமூலமும் அரசியலமைப்பிற்கு இணங்குகிறது என்பதையும், அதனை பாராளுமன்றத்தில் சாதாரண பெரும்பான்மை வாக்குகளால் நிறைவேற்ற முடியும் என்பதையும் உயர் நீதிமன்றம் தீர்மானித்துள்ளதாக சபாநாயகர் மேலும் பாராளுமன்றத்திற்கு அறிவித்தார்.
சபாநாயகர் வைத்தியர் ஜகத் விக்கிரமரத்னவின் விசேட உத்தரவின் பேரில் உயர் நீதிமன்றத்தால் வழங்கப்பட்ட இந்த முழுமையான தீர்ப்பையும் பாராளுமன்ற ஹன்சாட் உத்தியோகபூர்வ அறிக்கையில் சேர்க்கவும் நடவடிக்கை எடுக்கப்பட்டுள்ளது.