2019 ஆம் ஆண்டு முதல் பிரித்தானியாவில் காணாமல் போன மூன்று பிள்ளைகளின் தாயின் எலும்புக்கூடு என உறுதிப்படுத்தப்பட்ட எலும்புத் துண்டுகள் காட்டுத்தீயினால் அழிந்த வனப்பகுதியிலிருந்து கண்டுபிடிக்கப்பட்ட பின்னர், கொலை சதி குற்றச்சாட்டின் பேரில் சந்தேக நபர் ஒருவர் பொலிஸாரால் கைது செய்யப்பட்டுள்ளார். கிட்டத்தட்ட ஏழு ஆண்டுகளாக காணாமல் போயிருந்த 44 வயதான ஜோன் ஷீன் என்ற பெண்ணின் எலும்புக்கூடு, அவர் காணாமல் போன இடத்திலிருந்து 60 மைல்களுக்கு அப்பால் தென்மேற்கு லண்டனின் ஃபெல்தாம் பகுதியில் ஏற்பட்ட காட்டுத்தீக்குப் பின்னரே இவ்வாறு கண்டுபிடிக்கப்பட்டுள்ளது.
ஹாம்ப்ஷயர் பொலிஸாரால் இந்தச் சம்பவம் தொடர்பாக சவுத்தாம்ப்டன் பிரதேசத்தில் வசிக்கும் 56 வயதுடைய ஒருவர் இவ்வாறு கைது செய்யப்பட்டுள்ளார்.இந்த பெண் கடைசியாக 2019 ஆம் ஆண்டு டிசம்பர் மாதம் 5 ஆம் திகதி தனது நண்பருடன் ஃபேர்ஹாமில் இருந்து தனது சொந்த ஊரான சவுத்தாம்ப்டனுக்குப் பயணித்துக் கொண்டிருந்தபோது காணப்பட்டார். பல மாதங்களாக அவரிடமிருந்து எந்த தகவலும் கிடைக்காததால், குடும்ப உறுப்பினர்கள் 2020 ஆம் ஆண்டு பெப்ரவரி மாதம் பொலிஸில் முறைப்பாடு செய்திருந்தனர். 'லிட்டில் ஜோ' என்று அழைக்கப்பட்ட ஐந்து அடி உயரமுள்ள இந்தப் பெண் காணாமல் போனது குறித்து பொலிஸார் விரிவான விசாரணையை ஆரம்பித்திருந்தனர், அதில் 4000 க்கும் மேற்பட்ட விசாரணை வழிகளில் விசாரணைகள் நடத்தப்பட்டு, 300 க்கும் மேற்பட்ட வாக்குமூலங்கள் பதிவு செய்யப்பட்டன. மேலும், அவர் நடமாடிய பத்துக்கும் மேற்பட்ட முகவரிகளும் சில படகுகளும் பொலிஸ் சோதனைகளுக்கு உட்படுத்தப்பட்டன.
பெட்ஃபோன்ட் லேக்ஸ் கண்ட்ரி பார்க் அருகே இரண்டு ஹெக்டேர் பரப்பளவில் பரவிய தீ விபத்துக்குப் பல நாட்களுக்குப் பிறகு, ஆகஸ்ட் 12 ஆம் திகதி அப்பகுதியில் பயணித்த ஒருவரால் இந்த எலும்புக்கூடு முதலில் காணப்பட்டது. டிஎன்ஏ மற்றும் தடயவியல் பரிசோதனைகள் மூலம் இந்த உடல் ஷீன் அம்மையாருடையது என பொலிஸார் பின்னர் உறுதிப்படுத்தினர். அவருக்கு நிரந்தர முகவரி, வங்கிக் கணக்கு அல்லது கார் இல்லாததால், பொலிஸ் விசாரணைகளுக்கு பெரும் தடைகள் ஏற்பட்டன. இதற்கு முன்னர் 2020 ஆம் ஆண்டிலும் இந்தச் சம்பவம் தொடர்பாக ஐந்து ஆண்களும் ஒரு பெண்ணும் கைது செய்யப்பட்டு பின்னர் விடுவிக்கப்பட்டனர்.
அவரது இரண்டு மகள்களான லேலா மற்றும் ஹேலி, தங்கள் தாயார் மிகவும் அன்பான மற்றும் நட்பான பெண் என்று விவரித்திருந்தனர். இருப்பினும், அவர் ஒரு பாலியல் தொழிலாளியாகவும் செயல்பட்டுள்ளார் என்று பொலிஸார் முன்னர் தெரிவித்திருந்தனர். இந்த எலும்புக்கூடு கண்டுபிடிக்கப்பட்டதன் மூலம் விசாரணைகளுக்குப் பல புதிய வழிகள் திறக்கப்பட்டுள்ளன என்று துப்பறியும் தலைமை அதிகாரி டோபி எல்காக் குறிப்பிட்டார். இதற்கிடையில், இந்த விசாரணைக்கு உதவும் சரியான தகவலை வழங்குபவருக்கு 20,000 பவுண்டுகள் பணப் பரிசை வழங்க கிரைம்ஸ்டாப்பர்ஸ் அமைப்பு மீண்டும் நடவடிக்கை எடுத்துள்ளது.
