செயற்கை நுண்ணறிவின் (AI) விரைவான வளர்ச்சியுடன் எழக்கூடிய அபாயங்கள் மற்றும் அச்சுறுத்தல்கள் குறித்து உலகின் முன்னணி தொழில்நுட்ப நிறுவனங்களின் தலைவர்களுக்கு பிரித்தானியாவின் மன்னர் சார்லஸ் கடுமையான எச்சரிக்கை விடுத்துள்ளார். ஸ்காட்லாந்தில் உள்ள டம்ஃப்ரீஸ் ஹவுஸில் (Dumfries House) நடைபெற்ற ஒரு சிறப்பு கலந்துரையாடலில் கலந்துகொண்ட மன்னர், செயற்கை நுண்ணறிவுக்கான போட்டியில் மனிதகுலத்தின் பாதுகாப்பு மற்றும் இருப்பு கட்டாயம் உறுதி செய்யப்பட வேண்டும் என்று கூறினார்.
இந்தத் தொழில்நுட்பம் தவறான நபர்களின் கைகளில் விழுவதற்கு முன்பு, அதனால் ஏற்படக்கூடிய இருப்பு அச்சுறுத்தல்கள் உடனடியாகத் தீர்க்கப்பட வேண்டும் என்றும் அவர் வலியுறுத்தினார்.இந்தத் தொழில்நுட்பம் எதிர்காலத்தில் மனித உயிர்களுக்கே அச்சுறுத்தலாக அமையக்கூடிய இருண்ட திறன்களை வளர்த்துக்கொள்ளும் ஆபத்து உள்ளது என்றும் மன்னர் சார்லஸ் தனது கவலையை வெளிப்படுத்தியுள்ளார். இந்த சிறப்பு சந்திப்பில் கூகிள் டீப்மைண்ட் (Google DeepMind), என்விடியா (Nvidia), ஓபன்ஏஐ (OpenAI) மற்றும் ஆந்த்ரோபிக் (Anthropic) போன்ற உலகின் முன்னணி செயற்கை நுண்ணறிவு நிறுவனங்களை பிரதிநிதித்துவப்படுத்தி பல தலைவர்கள் கலந்துகொண்டனர். கூகிள் டீப்மைண்டின் சர் டெமிஸ் ஹசாபிஸ் மற்றும் என்விடியா நிறுவனத்தின் தலைவர் ஜென்சன் ஹுவாங் ஆகியோரும் இந்த கலந்துரையாடலில் பங்கேற்றதாக தெரிவிக்கப்பட்டுள்ளது. செயற்கை நுண்ணறிவைக் கட்டுப்படுத்த தொழில்துறையே ஒரு ஒழுங்குமுறையை கொண்டு வர வேண்டுமா என்பது குறித்தும் இங்கு கவனம் செலுத்தப்பட்டது.
இதற்கிடையில், மைக்ரோசாப்ட் நிறுவனத்தின் செயற்கை நுண்ணறிவுத் தலைவர் முஸ்தபா சுலைமான், பிபிசி ரேடியோ 4 அலைவரிசைக்கு கருத்துத் தெரிவிக்கையில், செயற்கை நுண்ணறிவின் எதிர்கால அச்சுறுத்தல்கள் குறித்து இதேபோன்ற எச்சரிக்கையை விடுத்துள்ளார். எதிர்காலத்தில் ஒருநாள் செயற்கை நுண்ணறிவு மனிதர்களுடன் போட்டியிடக்கூடிய ஒரு புதிய 'சிலிக்கான் இனம்' (silicon species) உருவாகும் சாத்தியம் இருப்பதாக அவர் சுட்டிக்காட்டியுள்ளார். மனிதர்களைப் போலவே சுதந்திரமாக செயல்படக்கூடிய மற்றும் தங்களின் சொந்த நோக்கங்களை வரையறுக்கக்கூடிய கருவிகள் உருவாவதன் மூலம் மனிதகுலம் எதிர்காலத்தில் ஒரு பெரிய சவாலை எதிர்கொள்ள நேரிடும் என்று தொழில்நுட்பத் துறை வல்லுநர்கள் மேலும் சுட்டிக்காட்டுகின்றனர்.