கொழும்பு 5, திம்பிரிகஸ்யாய பிரதேசத்தில் அமைந்துள்ள அடுக்குமாடி குடியிருப்பில் மர்மமான முறையில் உயிரிழந்திருந்த ஹம்பாந்தோட்டை நகர சபையின் முன்னாள் மேயர் எராஜ் ரவீந்திர பெர்னாண்டோ அவர்களின் சடலம் பம்பலப்பிட்டி பொலிஸ் அதிகாரிகள் குழுவினரால் நேற்று (02) கண்டுபிடிக்கப்பட்டது. பம்பலப்பிட்டி ஹேவ்லோக் டவுன் 6வது அவென்யூ அடுக்குமாடி குடியிருப்பில் உள்ள வீட்டில் 9 அடி உயரமான கதவில் ரப்பர் பட்டியைப் பயன்படுத்தி அவர் தற்கொலை செய்து கொண்டதாக விசாரணைகளில் தெரியவந்துள்ளது.சில மாதங்களுக்கு முன்னர் ஸ்ரீலங்கன் விமான நிறுவனத்தின் முன்னாள் நிறைவேற்றுப் பணிப்பாளர் கபில சந்திரசேன உயிரிழந்தது போன்றே எராஜ் பெர்னாண்டோவும் உயிரிழந்திருப்பது குறிப்பிடத்தக்கது.
உயிரிழக்கும் போது அவர் இந்த அடுக்குமாடி குடியிருப்பில் தனியாக வசித்து வந்துள்ளார். அவரது மனைவியும் இரண்டு மகள்களும் கனடாவில் வசிக்கின்றனர். அவர் நீண்ட காலமாக கடுமையான மன அழுத்தத்தால் பாதிக்கப்பட்டு வந்ததாகவும், அதற்காக மருத்துவ சிகிச்சையும் பெற்று வந்ததாகவும் பொலிஸ் விசாரணைகளில் மேலும் தெரியவந்துள்ளது.
கொழும்பு நாலந்தா கல்லூரியின் பழைய மாணவரான எராஜ் பெர்னாண்டோ 2011 முதல் 2021 வரை தீவிர அரசியலில் ஈடுபட்டார். அவர் இரண்டு முறை ஹம்பாந்தோட்டை மேயராகப் பணியாற்றினார். 2014 ஆம் ஆண்டில் மத்தள விமான நிலையம் மற்றும் ஹம்பாந்தோட்டை துறைமுகத்தைப் பார்வையிட வந்த அப்போதைய எதிர்க்கட்சியான ஐக்கிய தேசியக் கட்சி நாடாளுமன்ற உறுப்பினர்கள் குழுவை விரட்டியடித்ததற்கு தலைமை தாங்கியதால் அவர் மிகவும் பிரபலமானார்.
அச்சமயத்தில், அவர் உள்ளிட்ட குழுவினர் ஒரு பிஸ்டலை ஏந்தி நாடாளுமன்ற உறுப்பினர்களை துரத்தி விரட்டினர். நல்லாட்சி அரசாங்கத்தின் போது நடத்தப்பட்ட விசாரணைகளில், அன்று தான் கொண்டு வந்தது ஒரு பொம்மை பிஸ்டல் என்று அவர் கூறினாலும், அந்த சம்பவத்திற்காக அவர் குற்றவாளியாகக் கண்டறியப்பட்டு ஐந்து வருட சிறைத்தண்டனை விதிக்கப்பட்டது. இருப்பினும், பின்னர் ஏற்பட்ட ஆட்சி மாற்றத்துடன் அவருக்கு விடுதலை கிடைத்தது.
இது தவிர, ஹம்பாந்தோட்டை பிரதேசத்தில் நிலங்களை பலவந்தமாக அபகரித்தல் உள்ளிட்ட பல சட்டவிரோத நடவடிக்கைகளுக்காகவும் அவர் மீது குற்றச்சாட்டுகள் சுமத்தப்பட்டிருந்தன. இந்த மரணம் தொடர்பாக பம்பலப்பிட்டி பொலிஸார் மேலதிக விசாரணைகளை மேற்கொண்டு வருகின்றனர்.
