பணத் தகராறு ஒன்றின் அடிப்படையில் பேருவளைப் பிரதேசத்தில் உள்ள ஒரு சுற்றுலா விடுதி உரிமையாளரைக் கடத்தி, அவரது தங்க நகைகள், பணம், கையடக்கத் தொலைபேசிகள் மற்றும் ஒரு மோட்டார் சைக்கிளைக் கொள்ளையிட்ட சம்பவத்துடன் தொடர்புடைய இரு சந்தேக நபர்கள் களுத்துறை குற்றப் பிரிவினரால் கைது செய்யப்பட்டுள்ளனர். மாகோனைப் பிரதேசத்தில் கடந்த 20ஆம் திகதி இந்த கைது நடவடிக்கை மேற்கொள்ளப்பட்டுள்ளது.
சம்பவத்திற்கு சில நாட்களுக்கு முன்னர், ஒரு அறையை வாடகைக்கு எடுக்கும் சாக்கில் சம்பந்தப்பட்ட விடுதிக்கு வந்துள்ள மாகோனைப் பிரதேசத்தைச் சேர்ந்த இந்த இரு சந்தேக நபர்கள், வர்த்தகரை அச்சுறுத்தி, பலவந்தமாக முச்சக்கர வண்டியில் ஏற்றிச் சென்று மாகோனை பொது விளையாட்டு மைதானத்திற்கு அருகில் கொண்டு சென்றுள்ளனர்.
அங்கு தன்னிடம் இருந்து பெற்ற கடனைத் திருப்பித் தருமாறு சந்தேக நபர்கள் கோரியபோதும், வர்த்தகர் அதை மறுத்தவுடன், அவரை அச்சுறுத்தி, கைக்கடிகாரம், மோதிரங்கள், மூன்று கையடக்கத் தொலைபேசிகள், பணப்பை மற்றும் இரண்டு வங்கி அட்டைகளைக் கொள்ளையிட்டுள்ளனர். பின்னர், வர்த்தகரை வைத்து அவரது மனைவிக்கு அழைப்பு விடுத்து, வீட்டில் இருந்த மோட்டார் சைக்கிளையும் வேறொருவர் மூலம் வரவழைக்க சந்தேக நபர்கள் ஏற்பாடு செய்துள்ளனர்.
வர்த்தகரின் மனைவி பேருவளைப் பொலிஸில் செய்த முறைப்பாட்டின் அடிப்படையில் விசாரணைகள் ஆரம்பிக்கப்பட்டன, சம்பவத்திற்குப் பின்னர் பிரதேசத்திலிருந்து தப்பிச் சென்றிருந்த சந்தேக நபர்கள் களுத்துறை குற்றப் பிரிவின் பொறுப்பதிகாரி தலைமையிலான பொலிஸ் குழுவினரால் கைது செய்யப்பட்டனர். திருடப்பட்ட தங்க நகைகள், கையடக்கத் தொலைபேசிகள், பணப்பை, வங்கி அட்டைகள் மற்றும் மோட்டார் சைக்கிள் பொலிஸ் பொறுப்பில் எடுக்கப்பட்டுள்ளன, சந்தேக நபர்கள் களுத்துறை நீதவான் நீதிமன்றத்தில் ஆஜர்படுத்தப்படவிருந்தனர்.