பிரபலமான மாடல் சூலா பத்மேந்திர குமாரபதிரண அம்மையாரின் சந்தேகத்திற்கிடமான மரணம் தொடர்பாக திறந்த தீர்ப்பு வழங்கப்பட்டுள்ளதுடன், மேலதிக விசாரணைகளுக்காக அவரது உடல் பாகங்கள் அரச இரசாயன பகுப்பாய்வாளரிடம் ஒப்படைக்க நடவடிக்கை எடுக்கப்பட்டுள்ளது. பொரலஸ்கமுவ பிரதேசத்தில் வசித்து வந்த அவர், பிலியந்தலை, தும்போவில, கங்காராம வீதியில் அமைந்துள்ள ஒரு வர்த்தகரின் வீட்டில் படுக்கையில் உயிரிழந்த நிலையில் கண்டுபிடிக்கப்பட்டார்.
மருத்துவ அறிக்கைகளின்படி, அவரது உடலில் வெளிப்புற அல்லது உள் காயங்கள் எதுவும் காணப்படவில்லை என பிலியந்தலை பொலிஸார் தெரிவிக்கின்றனர்.பொலிஸாரின் ஆரம்பகட்ட விசாரணைகளில் தெரியவந்துள்ளதாவது, பத்தரமுல்லை பிரதேசத்தில் உள்ள ஒரு ஹோட்டலில் அவர் ஏற்பாடு செய்திருந்த நிகழ்வுக்குப் பின்னர், உயிரிழந்த மாடல், சம்பந்தப்பட்ட வர்த்தகருடன் கடந்த 31ஆம் திகதி அதிகாலை 5.00 மணியளவில் பிலியந்தலையில் உள்ள இந்த வீட்டிற்கு வந்துள்ளார். பின்னர், ஒரு அறையில் குப்புறப் படுத்திருந்த அவரை அன்றைய தினம் நண்பகல் 12.45 மணியளவில் எழுப்ப முயன்றபோதும், எந்தப் பதிலும் கிடைக்கவில்லை. அவர் படுத்திருந்த இடத்தில் தலையணை மற்றும் படுக்கை விரிப்புகளில் இரத்தம் படிந்திருப்பதைக் கண்டு சம்பந்தப்பட்ட வர்த்தகர் 1990 சுவசரிய ஆம்புலன்ஸ் சேவைக்கு அழைப்பு விடுத்துள்ளார்.
அங்கு வந்த சுகாதார ஊழியர்கள் பரிசோதித்து அவர் உயிரிழந்துவிட்டதை உறுதிப்படுத்திய பின்னர்,
சம்பந்தப்பட்ட வர்த்தகர் மற்றும் உயிரிழந்த மாடலின் தாயார் இருவரும் இது குறித்து பிலியந்தலை பொலிஸில் முறைப்பாடு செய்துள்ளனர். சம்பவம் தொடர்பாக கெஸ்பேவ நீதிமன்றத்திற்கு தகவல்கள் சமர்ப்பிக்கப்பட்ட பின்னர், பதில் நீதவான் சுனேத்ரா பெரேரா அம்மையார் சம்பவ இடத்தையும் சடலத்தையும் பரிசோதித்தார். நீதவானின் உத்தரவின்படி களுபோவில வைத்தியசாலையில் சட்ட வைத்திய அதிகாரியால் பிரேத பரிசோதனை நடத்தப்பட்டுள்ளதுடன், பிலியந்தலை பொலிஸார் மேலதிக விசாரணைகளை மேற்கொண்டு வருகின்றனர்.
