சிறைத்தண்டனை விதிக்கப்பட்ட வண. கலகொடஅத்தே ஞானசார தேரர் இன்று (07) கொழும்பு நீதவான் நீதிமன்றத்திற்கு அழைத்து வரப்பட்டார், சிறைச்சாலை திணைக்களம் அவரது காவி உடையை அகற்றி சாதாரண உடைகளை அணிவித்திருந்தது. இதற்கிடையில், பேராசிரியர் கொட்டபிட்டியே ராகுல தேரர் தலைமையிலான மகா சங்கத்தினரும் இன்று நீதிமன்ற வளாகத்திற்கு வந்திருந்தனர்.
ஞானசார தேரர் இன்று சாதாரண உடையில் நீதிமன்றத்திற்கு அழைத்து வரப்பட்டபோது, அதற்கு எதிர்ப்புத் தெரிவித்து பேராசிரியர் கொட்டபிட்டியே தேரர் தலைமையில் மகா சங்கத்தினரும் நீதிமன்றத்திற்கு வந்திருந்தனர். இஸ்லாம் மதத்தை அவமதித்த குற்றச்சாட்டில் குற்றவாளியாக அறிவிக்கப்பட்டு 9 மாத சிறைத்தண்டனை விதிக்கப்பட்ட வழக்கின் கீழ் கொழும்பு நீதவான் நீதிமன்றம் பிறப்பித்த உத்தரவின்படி ஞானசார தேரர் இன்று (7) மீண்டும் நீதிமன்றத்தில் ஆஜர்படுத்தப்பட்டார். இன்றும் தேரர் சாதாரண உடையில் நீதிமன்றத்திற்கு அழைத்து வரப்பட்டார். சாதாரண உடைகளை அணிவிக்க சிறைச்சாலை திணைக்களம் எடுத்த நடவடிக்கை தற்போது சர்ச்சையை ஏற்படுத்தியுள்ளது.அந்த நடவடிக்கைக்கு எதிர்ப்புத் தெரிவித்து இன்று காலை 9.00 மணிக்கு கொழும்பு நீதிமன்ற வளாகத்திற்கு முன்னால் அமைதியான ஆர்ப்பாட்டத்தை நடத்த கொட்டபிட்டியே தேரர் திட்டமிட்டிருந்த போதிலும், தேரர்கள் குழுவொன்று நீதிமன்ற வளாகத்திற்குள் நுழைவது காட்சிகளில் தெரிந்தது. கோட்டே ஸ்ரீ கல்யாணி சாமக்ரீதர்ம மகா சங்க சபையின் அனுநாயக்க, பிரதம செயலாளர், சாகித்ய சக்ரவர்த்தி அக்ரமகாபண்டித ஓய்வுபெற்ற சிரேஷ்ட பேராசிரியர் கலாநிதி கொட்டபிட்டியே ராகுல அனுநாயக்க தேரர் தனது சங்க சபை சார்பாக நேற்று இது குறித்து ஒரு அறிக்கையையும் வெளியிட்டிருந்தார்.
இது குறித்து கருத்து தெரிவித்த சிறைச்சாலைகள் ஆணையாளர் மற்றும் ஊடகப் பேச்சாளர் செனக பல்லேதன்ன, கடுமையான வேலைகளுடன் கூடிய சிறைத்தண்டனை விதிக்கப்பட்ட கைதிகள் சிறைச்சாலையால் வழங்கப்படும் சீருடையை அணிய வேண்டும் என்ற விதிமுறைகளின்படி இந்த நடவடிக்கை எடுக்கப்பட்டதாக தெரிவித்தார். சிறையில் அடைக்கப்பட்டுள்ள பிக்குகள் தொடர்பான சட்ட ஏற்பாடுகளும், கைதிகளை நீதிமன்றத்தில் ஆஜர்படுத்தும்போது பின்பற்றப்பட வேண்டிய சிறைச்சாலை விதிகளும் அதேபோன்று பின்பற்றப்பட்டுள்ளதாகவும் அவர் மேலும் குறிப்பிட்டார்.
