இலங்கையின் பொருளாதார நெருக்கடியால் பாதிக்கப்பட்டுள்ள மக்களுக்கு இலவசமாக விநியோகிப்பதற்காக இந்திய வர்த்தகர் ஒருவரால் நன்கொடையாக வழங்கப்பட்ட 130 மெட்ரிக் தொன் அரிசி அடங்கிய ஐந்து கொள்கலன்கள், சுமார் நான்கு மாதங்களாக சுங்கப் பிரிவின் கட்டுப்பாட்டில் தடுத்து வைக்கப்பட்டுள்ளதால் அவற்றை மீண்டும் மறு ஏற்றுமதி செய்ய அனுமதிக்குமாறு இறக்குமதியாளர்கள் கோரிக்கை விடுத்துள்ளனர்.
இந்த அரிசி இறக்குமதி செய்யப்பட்ட அமைப்பு நேற்று (24) சுங்கப் பணிப்பாளர் நாயகத்திற்கு எழுத்துப்பூர்வமாக அறிவித்ததாவது, நீண்ட காலமாக சேமித்து வைக்கப்பட்டுள்ளதால், இந்த அரிசி மனித நுகர்வுக்குப் பொருத்தமற்றதாக மாறும் அபாயம் உள்ளது. எனவே, ஒரு குறிப்பிட்ட அபராதத் தொகைக்கு உட்பட்டு இந்த அரிசி கையிருப்பை விடுவிக்குமாறும், அவ்வாறு செய்ய முடியாவிட்டால், அவற்றை மீண்டும் மறு ஏற்றுமதி செய்ய நடவடிக்கை எடுக்குமாறும் அந்த அமைப்பின் தலைவர் திரு. ரூவன் அசுரமுனி சுங்கப் பிரிவிடம் கோரிக்கை விடுத்துள்ளார்.கடந்த ஆகஸ்ட் மாதம் 7 ஆம் திகதி இந்த அரிசி கையிருப்பு நாட்டிற்கு வந்தடைந்ததுடன், ஆகஸ்ட் 10 ஆம் திகதி முதல் அதை விடுவிப்பதற்காக சம்பந்தப்பட்ட தரப்புகளுக்கு கோரிக்கைகள் முன்வைக்கப்பட்டன. இந்த அரிசி கையிருப்பு மக்களுக்கு இலவசமாக வழங்கப்படும் ஒரு தொண்டுப் பணி என்பதால், அதற்கான சுங்க வரிச் சலுகையை வழங்குமாறு ஜனாதிபதி, விவசாய மற்றும் வர்த்தக அமைச்சர்கள் மற்றும் நிதி அமைச்சின் செயலாளர் ஆகியோரிடம் பல சந்தர்ப்பங்களில் கோரிக்கைகள் விடுக்கப்பட்டதாக அந்த கடிதத்தில் குறிப்பிடப்பட்டுள்ளது. எவ்வாறாயினும், சுங்கத் திணைக்களம் சுங்கச் சட்டத்தின் 135 வது பிரிவின் கீழ் சம்பந்தப்பட்ட ஐந்து கொள்கலன்களையும் கைப்பற்றியுள்ளதாக எழுத்துப்பூர்வமாக அறிவித்துள்ளதாக தலைவர் சுட்டிக்காட்டுகிறார்.
கீரி பொன்னி சம்பா வகையைச் சேர்ந்த இந்த அரிசி கையிருப்புக்காக சம்பந்தப்பட்ட இந்திய வர்த்தகர் கப்பல் கட்டணத்தையும் செலுத்தி நாட்டிற்கு அனுப்பியிருந்தாலும், இந்த அரிசி ஒரு கிலோவுக்கு 65 ரூபாய் வீதம் சுங்க வரி செலுத்தப்பட வேண்டும் என்று வர்த்தக அமைச்சு அறிவித்துள்ளது. தற்போதுள்ள இந்த சட்ட மற்றும் வரிப் பிரச்சினைகள் காரணமாக மக்களுக்கு நிவாரணமாகக் கிடைத்த இந்த அரிசி கையிருப்பு தற்போது துறைமுகத்தில் சிக்கி அழிந்துபோகும் நிலையில் உள்ளது.
Tags:
News