மத்திய சுற்றாடல் அதிகார சபையின் ஊடகப் பேச்சாளர் கலாநிதி அஜித் குணவர்தன அவர்கள், இத்தினங்களில் நாட்டின் காற்றுத் தரம் வீழ்ச்சியடைந்துள்ளதாகத் தெரிவித்தார். குறிப்பாக வடக்கு, வடமத்திய, வடமேல் மற்றும் மேல் மாகாணங்களில் காற்றுத் தரச் சுட்டெண் உயர்வாகக் காணப்படுவதாகவும் அவர் சுட்டிக்காட்டினார்.
நேற்று மற்றும் இன்று காற்றுத் தரம் குறிப்பிடத்தக்க அளவில் வீழ்ச்சியடைந்துள்ளதாகவும், தற்போது காற்றுத் தரச் சுட்டெண் 150க்கும் 200க்கும் இடைப்பட்ட அளவில் உள்ளதாகவும் கலாநிதி குணவர்தன தெரிவித்தார்.
எல்லை தாண்டிய காற்றுச் சுழற்சியும், வடகிழக்கு பருவமழை தீவிரமடைந்தமையும் இச்சூழ்நிலைக்குக் காரணம் என்று அவர் மேலும் கருத்துத் தெரிவித்தார்.
கடந்த சில ஆண்டுகளாக இக்காலப்பகுதியில் இவ்வாறான நிலை அவதானிக்கப்பட்டுள்ளதாகச் சுட்டிக்காட்டிய மத்திய சுற்றாடல் அதிகார சபை, நாட்டின் காற்றுத் தரச் சுட்டெண் மற்றும் ஒட்டுமொத்த வளிமண்டலத்தின் தரம் குறித்தும் தொடர்ச்சியாகக் கவனம் செலுத்தி வருவதாக கலாநிதி அஜித் குணவர்தன வலியுறுத்தினார்.
இந்த மோசமான காற்றுத் தரம் காரணமாக உணர்திறன் கொண்டவர்களுக்கு ஏற்படக்கூடிய சுகாதாரப் பிரச்சினைகளைக் கருத்தில் கொண்டு, உடனடியாக மருத்துவ ஆலோசனை பெறுவது அல்லது தேவையான சிகிச்சையைப் பெறுவது பொருத்தமானது என்று அவர் அறிவுறுத்தினார்.
எவ்வாறாயினும், இச்சூழ்நிலை இன்றுக்குப் பின்னர் நீங்கும் என எதிர்பார்ப்பதாக கலாநிதி அஜித் குணவர்தன ஊடகங்களுக்குத் தெரிவித்தார்.