அனுராதபுரம் மாவட்டத்தில், மிஹிந்தலை பொலிஸ் பிரிவுக்குட்பட்ட சீப்புக்குளம் அபகஹவெல பிரதேசத்தில் இடம்பெற்ற யானை தொல்லை சம்பவத்தை வீடியோ எடுத்த பல்கலைக்கழக மாணவர் ஒருவர் தற்போது பெரும் அநீதிக்கு ஆளாகியுள்ளதாக தெரியவந்துள்ளது.
அந்த மாணவரின் கல்வி நடவடிக்கைகளும் பெரும் ஆபத்தில் உள்ளதாக அவரது உறவினர்கள் குற்றம் சாட்டுகின்றனர். சம்பவத்தை வீடியோ எடுக்க அவர் பயன்படுத்திய கையடக்கத் தொலைபேசியை வனவிலங்கு அதிகாரிகள் கைப்பற்றியுள்ளனர், அது இன்னும் அவரிடம் திருப்பித் தரப்படவில்லை.
ஜனவரி மாதம் நடைபெறவுள்ள பல்கலைக்கழகப் பரீட்சைகளுக்குத் தேவையான அத்தியாவசிய பாடக் குறிப்புகள், ஆய்வுத் தரவுகள் மற்றும் பல தனிப்பட்ட ஆவணங்கள் அந்த கையடக்கத் தொலைபேசியில் உள்ளதாக மாணவர் வனவிலங்கு அதிகாரிகளிடம் தெரிவித்துள்ளார். ஆனால், தொலைபேசி திரும்பக் கிடைக்காததால் அவர் கடும் மன உளைச்சலுக்கு ஆளாகியுள்ளதாகவும் தெரிவிக்கப்பட்டுள்ளது.
இந்தச் சம்பவத்தின் பின்னணி, சீப்புக்குளம் அபகஹவெல பிரதேசத்தில் ஒரு குழுவினர் காட்டு யானையை தீப்பந்தங்களால் அடித்து எரித்து மனிதாபிமானமற்ற முறையில் துன்புறுத்திய சோகமான நிகழ்வாகும்.
