2026 ஆம் ஆண்டில் பதிவான முதல் துப்பாக்கிச் சூட்டுச் சம்பவம் கடுவெல, நவகமுவ பிரதேசத்தில் இருந்து நேற்று (ஜனவரி 01) இரவு பதிவாகியுள்ளது.
இந்தத் தாக்குதலில் ஒருவர் உயிரிழந்ததுடன், மேலும் இருவர் படுகாயமடைந்தனர். நவகமுவ, கொரதோட்ட மணிக்காகர வீதியில் வாடகை வீட்டில் வசித்து வந்த மூன்று இளைஞர்கள் புத்தாண்டு கொண்டாட்டத்திற்காக மதுபான விருந்து நடத்திக் கொண்டிருந்தபோது, இரவு 9.30 மணிக்கும் 10.00 மணிக்கும் இடையில் இந்தச் சம்பவம் இடம்பெற்றுள்ளது. மோட்டார் சைக்கிள் மற்றும் முச்சக்கர வண்டியில் வந்த ஆயுததாரிகள் குழுவொன்று திடீரென வீட்டிற்குள் நுழைந்து பிஸ்டல் துப்பாக்கிகளால் இந்த இளைஞர்களை சுட்டுவிட்டு தப்பிச் சென்றுள்ளதாக பொலிஸார் தெரிவித்தனர்.
துப்பாக்கிச் சூட்டில் பொரளை பிரதேசத்தைச் சேர்ந்த 20 வயது இளைஞர் ஒருவர் சம்பவ இடத்திலேயே உயிரிழந்தார். படுகாயமடைந்த அம்பலாங்கொடை மற்றும் தெமட்டகொட பிரதேசங்களைச் சேர்ந்த இரண்டு இளைஞர்கள் முதலில் அத்துருகிரிய ஒறுவல பிரதேச வைத்தியசாலையில் அனுமதிக்கப்பட்டு, பின்னர் மேலதிக சிகிச்சைக்காக ஹோமாகம ஆதார வைத்தியசாலைக்கு மாற்றப்பட்டனர். வைத்தியசாலை வட்டாரங்கள் தெரிவித்துள்ளபடி, ஒரு காயமடைந்தவரின் உடலில் நான்கு துப்பாக்கி குண்டுகளும், மற்றவரின் உடலில் ஒரு துப்பாக்கி குண்டும் சிக்கியுள்ளன.
சம்பவம் நடந்த இடத்தில் பொலிஸ் விசாரணைகளில் சுமார் பதினைந்து வெற்றுத் தோட்டாக்கள் கண்டுபிடிக்கப்பட்டுள்ளன. ஆரம்பகட்ட விசாரணைகளில் வெளிவந்த தகவல்களின்படி, இந்த மூன்று இளைஞர்களும் குறித்த வீட்டை வாடகைக்கு எடுத்து ஒன்றரை மாதங்களுக்கு முன்பு குடியேறியுள்ளனர். ஒன்றரை மாதங்களுக்கு முன்பு "வனாதே சத்து" என்பவரின் காதலி மீது நடத்தப்பட்ட கூரிய ஆயுதத் தாக்குதலுக்குப் பழிவாங்கும் விதமாக அவரது தரப்பினரால் இந்த துப்பாக்கிச் சூடு நடத்தப்பட்டிருக்கலாம் என பொலிஸார் மேலும் சந்தேகிப்பதாக தெரிவித்தனர். நவகமுவ பொலிஸாரும், நுகேகொட குற்றப் புலனாய்வுப் பிரிவும் இணைந்து சம்பவம் தொடர்பில் விரிவான விசாரணைகளை மேற்கொண்டு வருகின்றன.