பயணிகள் போக்குவரத்து பஸ் சாரதிகளை இலக்காகக் கொண்டு புதிதாக ஆரம்பிக்கப்பட்ட நடமாடும் ஆய்வகப் பரிசோதனைத் திட்டத்தில் 56 சாரதிகள் பரிசோதிக்கப்பட்டதாகவும், அவர்களில் பத்து பேர் போதைப்பொருள் பயன்படுத்தியிருப்பது உறுதிப்படுத்தப்பட்டுள்ளதாகவும் போக்குவரத்து மற்றும் நெடுஞ்சாலைகள் பிரதி அமைச்சர் பிரசன்ன குணசேன தெரிவித்தார். போதைப்பொருள் பாவித்து வாகனம் ஓட்டும் பஸ் சாரதிகள் மற்றும் நடத்துனர்களை அடையாளம் காணும் நோக்கில் கடந்த ஜனவரி 22ஆம் திகதி இந்த விசேட நடவடிக்கை மேற்கொள்ளப்பட்டுள்ளது.
இந்தத் திட்டத்தின் முதல் கட்டம் கொழும்பு பாஸ்டியன் மாவத்தை தனியார் பஸ் தரிப்பிடத்தை மையமாகக் கொண்டு மேற்கொள்ளப்பட்டதுடன், அங்கு சீரற்ற முறையில் தெரிவு செய்யப்பட்ட சாரதிகள் குழுவினர் பரிசோதனைக்கு உட்படுத்தப்பட்டனர். அங்கு பெறப்பட்ட சிறுநீர் மாதிரிகளைப் பரிசோதித்தபோது ஐஸ் (Ice), ஹெரோயின் மற்றும் கஞ்சா போன்ற போதைப்பொருட்களைப் பயன்படுத்தியிருப்பது ஆரம்பகட்டமாக வெளிப்படுத்தப்பட்டுள்ளதுடன், அந்தச் சாரதிகளுக்கு எதிராக மேலதிக சட்ட நடவடிக்கை எடுக்க அதிகாரிகள் நடவடிக்கை எடுத்துள்ளனர்.
சீரற்ற முறையில் மேற்கொள்ளப்பட்ட ஒரு சில பரிசோதனைகளில் இவ்வளவு பேர் போதைப்பொருட்களுக்கு அடிமையாகியிருப்பது மிகவும் பாரதூரமானதும் சிக்கலானதுமான நிலைமை என பிரதி அமைச்சர் இங்கு சுட்டிக்காட்டினார். சில சாரதிகள் பல்வேறு தகவல் தொடர்பு முறைகள் மூலம் தகவல்களைப் பரிமாறிக்கொண்டு, பரிசோதனைகள் மேற்கொள்ளப்படும் வீதிகளைத் தவிர்த்துச் செல்ல முயன்றதும் அவதானிக்கப்பட்டுள்ளது.
இந்த பாதுகாப்புத் திட்டத்தை வெற்றிகரமாக முன்னெடுப்பதற்கு பஸ் உரிமையாளர்களும் பொதுமக்களும் மிகுந்த கவனத்துடன் ஒத்துழைப்பு வழங்க வேண்டும் என அரசாங்கம் வலியுறுத்துகிறது. பஸ் சாரதிகள் தொடர்பான இந்த பரிசோதனைத் திட்டம் தற்போது மேல் மாகாணத்தில் ஆரம்பிக்கப்பட்டுள்ள போதிலும், எதிர்காலத்தில் எந்தவித முன்னறிவிப்பும் இன்றி நாடு முழுவதும் அமுல்படுத்தவும், அதன் எண்ணிக்கையை அதிகரிக்கவும் போக்குவரத்து அமைச்சு தீர்மானித்துள்ளது.