பங்களாதேஷ் கிரிக்கெட் கட்டுப்பாட்டு வாரியத்தின் (BCB) நிதிக்குழுத் தலைவர் எம். நஸ்முல் இஸ்லாம், முன்னாள் தேசிய கிரிக்கெட் தலைவர் தமிம் இக்பாலை 'இந்திய உளவாளி' என்று குறிப்பிட்டதால் தற்போது பெரும் சர்ச்சைக்குள்ளாகியுள்ளார்.
வரவிருக்கும் இருபதுக்கு -20 உலகக் கோப்பை கிரிக்கெட் போட்டியில் பங்களாதேஷ் பங்கேற்பது குறித்து இறுதி முடிவு எடுப்பதற்கு முன், மற்ற விஷயங்களை ஒதுக்கிவிட்டு கிரிக்கெட்டுக்கு முன்னுரிமை அளிக்க வேண்டும் என்று தமிம் இக்பால் சமீபத்திய நேர்காணலில் தெரிவித்திருந்தார். அதற்கு பதிலளிக்கும் விதமாகவே நஸ்முல் இஸ்லாம் இந்த சர்ச்சைக்குரிய அறிக்கையை வெளியிட்டார். பாதுகாப்பு காரணங்களுக்காக இந்தியாவில் சுற்றுப்பயணம் செய்ய வேண்டாம் என்று BCB வாரியம் முடிவெடுத்தது மற்றும் ஐ.பி.எல் (IPL) தொடருக்காக முஸ்தாபிசுர் ரஹ்மானை விடுவிக்குமாறு இந்திய கிரிக்கெட் கட்டுப்பாட்டு வாரியம் கொல்கத்தா நைட் ரைடர்ஸ் அணியிடம் கோரியது போன்ற பின்னணியில் தமிம் இந்த கருத்துக்களை வெளியிட்டிருந்தார்.
இந்த சம்பவத்திற்குப் பிறகு ஏற்பட்ட கடுமையான எதிர்ப்பின் காரணமாக நஸ்முல் இஸ்லாம் தனது பேஸ்புக் பதிவை நீக்கினாலும், அதன் ஸ்கிரீன்ஷாட்கள் தற்போது சமூக வலைத்தளங்களில் வேகமாகப் பரவி வருகின்றன. அந்தப் பதிவில், பங்களாதேஷ் மக்கள் தங்கள் கண்களாலேயே மற்றொரு உறுதிப்படுத்தப்பட்ட இந்திய உளவாளியின் தோற்றத்தைக் கண்டதாக அவர் குறிப்பிட்டிருந்தார்.
இந்த அறிக்கை தொடர்பாக கடுமையான எதிர்ப்பைத் தெரிவித்த பங்களாதேஷ் கிரிக்கெட் வீரர்கள் நலன்புரி சங்கம் (CWAB) வெள்ளிக்கிழமை ஒரு அறிக்கையை வெளியிட்டது. அதில், சம்பந்தப்பட்ட அதிகாரி பகிரங்கமாக மன்னிப்பு கேட்க வேண்டும் என்றும் அவருக்கு எதிராக ஒழுங்கு நடவடிக்கை எடுக்கப்பட வேண்டும் என்றும் தெரிவித்து BCB தலைவருக்கு ஒரு கடிதம் அனுப்பியுள்ளதாகக் கூறியது. 16 ஆண்டுகளாக நாட்டைப் பிரதிநிதித்துவப்படுத்திய பங்களாதேஷ் வரலாற்றின் வெற்றிகரமான தொடக்க ஆட்டக்காரர் குறித்து வாரியத்தின் பொறுப்புள்ள அதிகாரி வெளியிட்ட இந்த அறிக்கையை முழுமையாகக் கண்டிப்பதாகவும், தமிம் போன்ற வீரருக்கு மட்டுமல்ல, நாட்டின் எந்தவொரு வீரருக்கும் இதுபோன்ற அறிக்கைகளை வெளியிடுவது ஏற்றுக்கொள்ள முடியாதது என்றும், இது ஒட்டுமொத்த கிரிக்கெட் சமூகத்திற்கும் இழைக்கப்பட்ட அவமானம் என்றும் சங்கம் வலியுறுத்தியது.
பொறுப்புள்ள பதவியில் இருக்கும் ஒரு இயக்குனர் பொது மேடையில் இதுபோன்ற அறிக்கைகளை வெளியிடுவது, நிர்வாக வாரிய அதிகாரிகளின் நடத்தை நெறிமுறைகள் குறித்து கடுமையான கேள்விகளை எழுப்புகிறது என்று சுட்டிக்காட்டிய வீரர்கள் நலன்புரி சங்கம், சம்பந்தப்பட்ட அதிகாரியை பொறுப்பேற்க வைத்து உரிய நடவடிக்கை எடுக்குமாறு பங்களாதேஷ் கிரிக்கெட் தலைவரைக் கேட்டுக்கொண்டது.
இந்த சம்பவம் தொடர்பாக தஸ்கின் அஹமது, மொமினுல் ஹக் மற்றும் தைஜுல் இஸ்லாம் போன்ற தற்போதைய பங்களாதேஷ் கிரிக்கெட் வீரர்களும் சமூக வலைத்தளங்களில் தங்கள் கடுமையான அதிருப்தியை வெளிப்படுத்தியுள்ளனர். தேசிய அணியின் வீரர் குறித்து வாரியத்தின் இயக்குனர் பயன்படுத்திய வார்த்தைகள் ஒருபோதும் ஏற்றுக்கொள்ள முடியாதவை என்றும், இது அருவருப்பானது மற்றும் தங்கள் கிரிக்கெட் கலாச்சாரத்திற்கு எதிரானது என்றும் தைஜுல் இஸ்லாம் தெரிவித்தார். பொறுப்புள்ள பதவியில் இருந்து கொண்டு இதுபோன்ற பொது அறிக்கைகளை வெளியிடுவது தொழில்முறை, நெறிமுறைகள் மற்றும் அதிகாரிகளின் நடத்தை முறை குறித்து கேள்விகளை எழுப்புவதால், சம்பந்தப்பட்ட இயக்குனர் பகிரங்கமாக மன்னிப்பு கேட்க வேண்டும் என்றும் அவர் மேலும் கூறினார்.
ஒரு மூத்த வீரருக்கு குறைந்தபட்ச மரியாதையையும் வழங்காமல் பகிரங்கமாக அவமதிப்பது சம்பந்தப்பட்ட அதிகாரியின் அடிப்படை ஒழுக்கம் குறித்து கேள்விகளை எழுப்புகிறது என்று மொமினுல் ஹக் குறிப்பிட்டார். இந்த செயலை கடுமையாக கண்டிப்பதாகவும், இதற்கு எதிராக விரைவான மற்றும் கடுமையான நடவடிக்கை எடுக்குமாறும் அவர் கேட்டுக்கொண்டார். கிரிக்கெட் பங்களாதேஷின் உயிர்நாடி என்று சுட்டிக்காட்டிய தஸ்கின் அஹமது, நாட்டிற்கு பெரும் பங்களிப்பை வழங்கிய முன்னாள் தலைவரை இலக்காகக் கொண்டு இதுபோன்ற அறிக்கைகள் பங்களாதேஷ் கிரிக்கெட்டின் எதிர்காலத்திற்கு உகந்தவை அல்ல என்றும், சம்பந்தப்பட்ட அதிகாரிகள் எதிர்காலத்தில் மிகவும் பொறுப்புள்ள நிலைப்பாட்டை எடுப்பார்கள் என்று தான் எதிர்பார்ப்பதாகவும் தெரிவித்தார்.