கொழும்பு பங்குச் சந்தை (CSE) குற்றப் புலனாய்வுத் திணைக்களத்தில் முறைப்பாடு ஒன்றை பதிவு செய்துள்ளது. அவர்களின் பெயர் மற்றும் சின்னத்தை தவறாகப் பயன்படுத்தி, ஒரு போலி நிறுவனம் முதலீட்டாளர்களிடமிருந்து 17 மில்லியன் ரூபாய்க்கும் அதிகமான பணத்தை மோசடி செய்தமை தொடர்பிலாகும்.
கொழும்பு பங்குச் சந்தையின் சிரேஷ்ட உப தலைவர் (சந்தைப்படுத்தல்) நிரோஷன் விஜேசுந்தர அவர்கள், இந்த மோசடிக்காரர்கள் பங்குச் சந்தை முதலீடுகள் மற்றும் நிதி ஆலோசனை சேவைகளை வழங்குவதாக உறுதியளித்து, கொழும்பு பங்குச் சந்தையில் பதிவு செய்யப்பட்ட சட்டபூர்வமான நிதி நிறுவனமாக தங்களை அடையாளப்படுத்தியுள்ளனர் என்று தெரிவித்தார்.
இந்த மோசடி ஒரு போலி மொபைல் செயலி (Mobile App) மூலம் மேற்கொள்ளப்பட்டுள்ளது என்றும், அது கடந்த ஆண்டு நவம்பர் மாதம் முதல் செயல்பட்டு வருவதாக நம்பப்படுகிறது என்றும் தெரிவிக்கப்பட்டுள்ளது.
இதுவரை 17 மில்லியன் ரூபாய்க்கும் அதிகமான பணம் மோசடி செய்யப்பட்டுள்ள போதிலும், பாதிக்கப்பட்டவர்களின் சரியான எண்ணிக்கையை தீர்மானிப்பது கடினம் என்று விஜேசுந்தர மேலும் தெரிவித்தார்.
இந்த சம்பவம் தொடர்பாக இதுவரை எந்த சந்தேக நபரும் அடையாளம் காணப்படவில்லை என்றும், குற்றப் புலனாய்வுத் திணைக்களம் (CID) இது குறித்து விரிவான விசாரணையை ஆரம்பித்துள்ளது என்றும் தெரிவிக்கப்பட்டுள்ளது.
இதேபோன்ற மோசடிகளுக்கு ஆளாகாமல் இருக்க, பங்குச் சந்தையில் முதலீடு செய்யும் போது சரியான நடைமுறைகளைப் பின்பற்றுமாறும், கொழும்பு பங்குச் சந்தை மூலம் நேரடியாக உத்தியோகபூர்வ ஆலோசனைகளையும் முதலீட்டுத் தகவல்களையும் பெறுமாறும் விஜேசுந்தர அவர்கள் முதலீட்டாளர்களை வலியுறுத்தினார்.