கடந்த 2022 ஆம் ஆண்டு மே மாதம் 09 ஆம் திகதி நிட்டம்புவ பிரதேசத்தில் பாராளுமன்ற உறுப்பினர் அமரகீர்த்தி அத்துகோரல மற்றும் அவரது பாதுகாப்பு அதிகாரி படுகொலை செய்யப்பட்ட சம்பவம் தொடர்பான தீர்ப்பை அறிவித்து, பன்னிரண்டு பிரதிவாதிகளுக்கு மரண தண்டனை விதிக்குமாறு கம்பஹா விசேட மூவரடங்கிய மேல் நீதிமன்ற நீதிபதிகள் குழாம் இன்று உத்தரவிட்டது.
சஹான் மாபா பண்டார, ரஷ்மி சிங்கப்புலி மற்றும் ரஷாந்த கொடவெல ஆகிய மேல் நீதிமன்ற நீதிபதிகளைக் கொண்ட நீதிபதிகள் குழாம் முன்னிலையில் இந்த வழக்கு நீண்ட காலமாக விசாரிக்கப்பட்டதுடன், இன்று அறிவிக்கப்பட்டது நீதிபதிகளிடையே ஏற்பட்ட பிளவுபட்ட தீர்ப்பாகும்.
அங்கு, மூவரடங்கிய நீதிபதிகள் குழாமின் தலைவர் நீதிபதி சஹான் மாபா பண்டார, முப்பத்தேழு பிரதிவாதிகளையும் நிரபராதிகள் என விடுவிக்க தீர்மானித்த போதிலும், ரஷ்மி சிங்கப்புலி மற்றும் ரஷாந்த கொடவெல ஆகிய நீதிபதிகளின் பெரும்பான்மை இணக்கப்பாட்டின் அடிப்படையில் பிரதிவாதிகளுக்கு தண்டனை விதிக்கப்பட்டது.
அதன்படி, பெரும்பான்மை நீதிபதிகளின் தீர்ப்பின் கீழ், வழக்கில் பன்னிரண்டு பிரதிவாதிகளுக்கு மரண தண்டனை விதிக்கப்பட்டதுடன், மேலும் இருபத்து மூன்று பிரதிவாதிகள் அனைத்து குற்றச்சாட்டுகளிலிருந்தும் விடுவிக்க மேல் நீதிமன்றம் நடவடிக்கை எடுத்தது.
கூடுதலாக, வழக்கில் எஞ்சிய நான்கு பிரதிவாதிகளுக்கு ஆறு மாத சிறைத்தண்டனை விதிக்க நீதிபதிகள் குழாம் தீர்மானித்ததுடன், அந்த சிறைத்தண்டனையை ஐந்து ஆண்டுகளுக்கு ஒத்திவைக்குமாறு உத்தரவிட்டது.
கடந்த போராட்ட காலத்தில் நிட்டம்புவ நகரில் வன்முறைக் கும்பல் நடத்திய தாக்குதலால் பொலன்னறுவை மாவட்ட பாராளுமன்ற உறுப்பினர் அமரகீர்த்தி அத்துகோரலவும் அவரது தனிப்பட்ட பாதுகாப்பு அதிகாரி ஜயந்த குணவர்தனவும் உயிரிழந்தனர்.
இந்த இரட்டைக் கொலைச் சம்பவத்துடன் தொடர்புடைய சந்தேகநபர்கள் கைது செய்யப்பட்டதன் பின்னர், சட்டமா அதிபரால் கம்பஹா மேல் நீதிமன்றத்தில் குற்றப்பத்திரிகை தாக்கல் செய்யப்பட்டதுடன், கடந்த ஜனவரி மாதம் அறிவிக்கப்படவிருந்த இந்தத் தீர்ப்பு இன்று வரை ஒத்திவைக்கப்பட்டிருந்தது.
2022 மே 9 அன்று போராட்டத்திற்கு எதிராக அரசாங்கம் மேற்கொண்ட அடக்குமுறையால் ஆத்திரமடைந்த இளைஞர்கள், அமரகீர்த்தி அத்துகோரலவும் அவரது பாதுகாப்பு அதிகாரியும் பயணித்த வாகனத்தை நிறுத்தி, அதைச் சுற்றி வளைத்து ஆர்ப்பாட்டம் செய்தபோது, கூட்டத்தை அச்சுறுத்தும் நோக்கில் வாகனத்திற்குள் இருந்த பாதுகாப்பு அதிகாரி இளைஞர்கள் மீது துப்பாக்கிச் சூடு நடத்தினார். அப்போது ஒரு இளைஞர் சம்பவ இடத்திலும், பின்னர் மற்றொரு இளைஞர் மருத்துவமனையிலும் உயிரிழந்தனர். அந்த மரணங்களுக்கு அமைச்சர் பாதுகாப்பு அதிகாரியே பொறுப்பாவார். இந்தத் தாக்குதலுக்குப் பிறகு, இளைஞர்கள் அவர்களைத் துரத்திச் சென்றபோது, வாகனத்தில் இருந்து இறங்கிய இருவரும் அருகில் இருந்த ஆயத்த ஆடை நிறுவனக் கட்டிடத்திற்குள் புகுந்தனர். அவர்களைப் பின்தொடர்ந்து சென்ற இளைஞர்கள், அவர்களது சொந்த துப்பாக்கிகளாலேயே அவர்களைக் கொன்றனர். இருப்பினும், இளைஞர்கள் முதலில் அவர்கள் தற்கொலை செய்து கொண்டதாகவே சாட்சியமளித்தனர். நிராயுதபாணியான போராட்டக் களத்தில் மேடைகளை அழித்து கூட்டத்தை விரட்டியடித்த பின்னர், நாடு முழுவதும் குழப்பமான சூழ்நிலை நிலவியது. அன்றைய தினம் பிரதமராக இருந்த மஹிந்த ராஜபக்ஷவின் இராஜினாமா மற்றும் அமைச்சர்களின் வீடுகள் எரிக்கப்பட்ட துரதிர்ஷ்டவசமான சம்பவங்கள் நிறைந்த நாளாகவும் அது அமைந்தது.
