ஒரு மசாஜ் நிலையத்தில் (ஸ்பா) பதினாறு வயது சிறுமியை பாலியல் தொழிலில் ஈடுபடுத்தியதாகக் கூறப்படும் அந்த மசாஜ் நிலையத்தின் முகாமையாளர், ராகம பொலிஸ் அதிகாரிகள் குழுவினரால் சந்தேகத்தின் பேரில் கைது செய்யப்பட்டார். அந்த மசாஜ் நிலையத்தில் வேலைக்கு அமர்த்தப்பட்டிருந்த பதினாறு வயது சிறுமி மீட்கப்பட்டதாக பொலிஸார் தெரிவித்தனர்.கைது செய்யப்பட்ட மசாஜ் நிலையத்தின் முகாமையாளர் வெலிசரை நீதவான் நீதிமன்றத்தில் நேற்று முன்தினம் (9) ஆஜர்படுத்தப்பட்ட பின்னர், இந்த மாதம் 20 ஆம் திகதி வரை விளக்கமறியலில் வைக்க உத்தரவிடப்பட்டது. சிறுமி மருத்துவ பரிசோதனைக்காக வட கொழும்பு ராகம போதனா வைத்தியசாலையில் அனுமதிக்கப்பட்டார்.
பொலிஸ் 119 அவசர அழைப்புப் பிரிவுக்கு கிடைத்த தகவலின்படி, ராகம பொலிஸ் சார்ஜன்ட் ஜயதிஸ்ஸ (52089) உள்ளிட்ட பொலிஸ் குழுவினர் ராகம பிரதேசத்தில் அமைந்துள்ள அந்த மசாஜ் நிலையத்திற்குச் சென்று விசாரணைகளை மேற்கொண்டு சிறுமியை மீட்டு, அதன் முகாமையாளரை சந்தேகத்தின் பேரில் கைது செய்துள்ளனர். இந்த மசாஜ் நிலையத்தின் உரிமையாளரைக் கைது செய்வதற்காகவும் பொலிஸார் விசாரணைகளை மேற்கொண்டு வருகின்றனர்.
சிறுமி இதற்கு முன்னர் தனது காதலன் என்று கூறப்படும் இளைஞனால் துஷ்பிரயோகத்திற்கு உள்ளாகியுள்ளார் என்று கூறப்படும் நிலையில், அந்த இளைஞன் ஐஸ் போதைப்பொருளை வைத்திருந்ததாகக் கூறி பொலிஸாரால் கைது செய்யப்பட்டு விளக்கமறியலில் வைக்கப்பட்டுள்ளதாகவும் பொலிஸார் தெரிவித்தனர்.
காதலன் என்று கூறப்படும் இளைஞன் விளக்கமறியலில் வைக்கப்பட்ட பின்னர், அவனது நண்பன் என்று கூறப்படும் இளைஞன் ஒருவன் அவளை இந்த மசாஜ் நிலையத்தில் கொண்டு வந்து ஒப்படைத்துள்ளதாகக் கூறப்படுகிறது. சிறுமியிடம் மேற்கொள்ளப்பட்ட விசாரணைகளில் இது தெரியவந்ததாகவும் பொலிஸார் தெரிவித்தனர். சிறுமியை மசாஜ் நிலையத்திற்கு அழைத்துச் சென்று ஒப்படைத்ததாகக் கூறப்படும் இளைஞனை கைது செய்ய பொலிஸார் விசாரணைகளை மேற்கொண்டு வருகின்றனர். கைது செய்ய தேடப்படும் இந்த இளைஞன் சிறுமியை மசாஜ் நிலையத்திற்கு கொடுத்து பணம் பெற்றிருக்கலாம் என பொலிஸார் சந்தேகிக்கின்றனர்.