நேற்று நள்ளிரவு முதல் அமுல்படுத்த திட்டமிடப்பட்டிருந்த ரயில் சாரதிகளின் வேலைநிறுத்தப் போராட்டம் இடைநிறுத்தப்பட்டுள்ளதால், இன்று ரயில் சேவைகள் வழமைபோல எவ்வித இடையூறுமின்றி இடம்பெறும் என ரயில் சாரதிகள் தொழிற்சங்கங்கள் அறிவித்துள்ளன.
இந்த தொழிற்சங்க நடவடிக்கை லோகோமோட்டிவ் ஓபரேட்டிங் இன்ஜினியர்ஸ் மற்றும் லோகோமோட்டிவ் ஆபீசர்ஸ் அசோசியேஷன் ஆகிய சங்கங்களால் அழைப்பு விடுக்கப்பட்டது. போட்டிப் பரீட்சை மூலம் சாரதி பயிற்சிக்குத் தெரிவு செய்யப்பட்ட சிவில் நபர்களுக்கு மேலதிகமாக, இருபது இராணுவ வீரர்களுக்கும் ரயில் சாரதி பயிற்சி வழங்க அரசாங்கம் எடுத்த தீர்மானத்திற்கு எதிர்ப்புத் தெரிவித்து அவர்கள் இந்த வேலைநிறுத்தத்திற்குத் தயாராகினர்.
எவ்வாறாயினும், நேற்று இரவு நடைபெற்ற விசேட ஊடகவியலாளர் சந்திப்பில் போக்குவரத்து மற்றும் நெடுஞ்சாலைகள் பிரதி அமைச்சர் வைத்தியர் பிரசன்ன குணசேன, இராணுவ அதிகாரிகளுக்கு பயிற்சி வழங்கும் தீர்மானம் தற்காலிகமாக இடைநிறுத்தப்பட்டுள்ளதாகத் தெரிவித்தார். இம்முறை க.பொ.த. சாதாரண தரப் பரீட்சைக்குத் தோற்றும் சுமார் நான்கரை இலட்சம் மாணவர்கள் எவ்வித போக்குவரத்து அசௌகரியங்களுக்கும் உள்ளாகக் கூடாது என்பதால், வேலைநிறுத்தத்தைத் தடுக்கும் நோக்கில் இந்தத் தீர்மானம் எடுக்கப்பட்டதாக அமைச்சர் அங்கு வலியுறுத்தினார்.
ரயில் சாரதிகளின் இந்த எதிர்ப்பை கடுமையாகக் கண்டிப்பதாகத் தெரிவித்த பிரதி அமைச்சர், அண்மையில் ஏற்பட்ட 'தித்வா' சூறாவளி நிலைமையின் போது ரயில்வே திணைக்களத்தை வழமைக்குக் கொண்டுவர இராணுவம் வழங்கிய சிறப்பான பங்களிப்பை அங்கு நினைவுபடுத்தினார். பெய்லி பாலங்கள் அமைத்தல், ரயில் தண்டவாளங்களை பழுதுபார்த்தல் மற்றும் இரத்மலானை பணிமனையில் ரயில் என்ஜின்களை பழுதுபார்த்தல் ஆகியவற்றுக்காக சுமார் இரண்டு மாதங்களாக இராணுவ பொறியியலாளர்கள் வழங்கும் ஒத்துழைப்பைப் பாராட்டிய அவர், அவசர சூழ்நிலைகளில் பயன்படுத்துவதற்காக ஒரு குழு இராணுவ வீரர்களுக்கு இந்த தொழில்முறை பயிற்சி வழங்க முதலில் தீர்மானிக்கப்பட்டதாகவும் மேலும் தெரிவித்தார்.