தலங்கம அக்குரேகொட பிரதேசத்தில் ஒரு வழக்கறிஞரையும் அவரது மனைவியையும் சுட்டுக் கொல்லப்பட்ட சம்பவத்தில் இரண்டாவது துப்பாக்கிதாரருக்கு அடைக்கலம் கொடுத்ததாகக் கூறப்படும் 50 வயதுடைய தனியார் வகுப்பு ஆசிரியர் ஒருவர் மொனராகலை தலைமையகப் பொலிஸாரால் கைது செய்யப்பட்டுள்ளார். மொனராகலை தலைமையகப் பொலிஸ் பிரதான பொலிஸ் பரிசோதகர் பிரியந்த பிரேமதிலக்க தலைமையிலான குழுவினரால் இந்த சந்தேகநபர் மெதகம நன்னபுராவ, திவியாபொல சந்தியில் உள்ள தற்காலிக வீட்டில் மறைந்திருந்த போது கைது செய்யப்பட்டுள்ளார்.
இந்த வகுப்பு ஆசிரியரால், முன்னாள் கடற்படை வீரரான சம்பந்தப்பட்ட துப்பாக்கிதாரி உட்பட மூவருக்கு மறைந்திருக்க, மொனராகலை, நக்கல டேங்கவத்த பிரதேசத்தில் உள்ள தனது வீட்டை வழங்கியுள்ளமை விசாரணைகளில் உறுதி செய்யப்பட்டுள்ளது.ஒழுங்கமைக்கப்பட்ட குற்றக் கும்பல் உறுப்பினர்களுடன் இந்த ஆசிரியருக்கு உள்ள தொடர்புகள் குறித்து கண்டறியும் பொருட்டு பொலிஸார் அவரிடம் நீண்ட நேரம் விசாரணை நடத்தவுள்ளனர். கடந்த 13ஆம் திகதி இடம்பெற்ற இந்த இரட்டைக் கொலை தொடர்பில் இதுவரை துப்பாக்கிதாரிகளாகச் செயற்பட்ட முன்னாள் இராணுவ வீரர் ஒருவரும் முன்னாள் கடற்படை வீரர் ஒருவரும் உட்பட ஏழு பேர் பாதுகாப்புப் பிரிவினரால் கைது செய்யப்பட்டுள்ளனர்.
கொலை செய்யப்பட்ட வழக்கறிஞரையும் அவரது மனைவியையும் சுடுவதற்கு சந்தேகநபர்கள் T56 ரக துப்பாக்கி ஒன்றையும் பிஸ்டல் ஒன்றையும் பயன்படுத்தியுள்ளதாகவும், அதில் T56 ரக தோட்டாக்கள் ஆறு மற்றும் பிஸ்டல் தோட்டாக்கள் இரண்டு பயன்படுத்தப்பட்டுள்ளதாகவும் பொலிஸார் கண்டறிந்துள்ளனர். துப்பாக்கிச் சூட்டில் வழக்கறிஞரின் தலைக்கும் அவரது மனைவியின் மார்புப் பகுதிக்கும் பலத்த காயங்கள் ஏற்பட்டிருந்தன. இந்த குற்றம் ஜயலத் சில்வா அல்லது 'கரந்தெனியெ சுத்தா'வின் அறிவுறுத்தலின் பேரில், வெளிநாட்டில் உள்ள ஒழுங்கமைக்கப்பட்ட குற்றவாளியான மோதர நிபுணவின் மைத்துனரான உக்கல்ல ஆரச்சிகே தரிந்து மதுசங்க அல்லது 'டுட்டு' எனப்படும் பாரிய போதைப்பொருள் கடத்தல்காரரால் வழிநடத்தப்பட்டுள்ளது என சிரேஷ்ட பொலிஸ் அதிகாரி ஒருவர் தெரிவித்தார்.
இவ்வாறு கொலை செய்யப்பட்ட வழக்கறிஞர் கடந்த ஐந்து வருட காலப்பகுதியில் குற்றவியல் வழக்குகளுக்காக ஆஜரானவர் என பொலிஸார் தெரிவிக்கின்றனர். வெளிநாட்டில் உள்ள ஒழுங்கமைக்கப்பட்ட குற்றவாளியான கரந்தெனியெ சுத்தாவுக்கான வழக்குகளிலும் அவர் ஆஜராகியுள்ளார். அத்துடன், பெலாரஸ் நாட்டில் கைது செய்யப்பட்டு நாட்டிற்கு கொண்டுவரப்பட்டு மேல் மாகாண வடக்கு குற்றப் பிரிவில் தடுத்து வைக்கப்பட்டிருந்த சுஜீவ ரூவன் குமார அல்லது 'லொக்கு பெட்டி' என்பவருக்கு சட்ட உதவி வழங்கியவரும் இந்த வழக்கறிஞரே ஆவார். அத்துருகிரியவில் கிளப் வசந்த கொலை வழக்கு கடுவெல நீதிமன்றத்தில் கடந்த 13ஆம் திகதி விசாரணைக்கு வந்தபோது, லொக்கு பெட்டிக்காக ஆஜரானவரும் இந்த வழக்கறிஞரே என பொலிஸ் விசாரணைகள் மூலம் மேலும் தெரியவந்துள்ளது.