முன்னாள் பிரதம நீதியரசரும், முன்னாள் சட்டமா அதிபருமான மோகன் பீரிஸ் அவர்களிடம் இலஞ்சம் அல்லது ஊழல் குற்றச்சாட்டுகள் விசாரணை ஆணைக்குழு நேற்று (16) இரண்டரை மணி நேரம் விசாரணை நடத்தி வாக்குமூலம் பதிவு செய்துள்ளது. ஆணைக்குழு முன்னர் வழங்கிய அறிவித்தலுக்கு அமைய, அவர் நேற்று காலை 9.00 மணியளவில் சில வழக்கறிஞர்களுடன் குறித்த ஆணைக்குழு முன்னிலையில் ஆஜராகியுள்ளார்.
இந்த விசாரணை, ஒரு வீட்டுத் தொகுதியில் உள்ள பல வீடுகளை சட்டவிரோதமான முறையில் சிலருக்கு வழங்குவதற்கு பரிந்துரைத்து கடிதங்கள் வழங்கிய சம்பவம் தொடர்பான விசாரணையை அடிப்படையாகக் கொண்டது. குறித்த சம்பவம் தொடர்பில் விரிவாக விளக்கமளித்த பின்னர் மோகன் பீரிஸ் அவர்கள் இலஞ்ச ஆணைக்குழுவில் இருந்து வெளியேறியுள்ளதாக தகவல்கள் உறுதிப்படுத்துகின்றன.
இதற்கிடையில், இந்த வீடுகளை வழங்கும் சம்பவம் தொடர்பில் வாக்குமூலம் வழங்குவதற்காக கடந்த 13ஆம் திகதி இலஞ்ச ஆணைக்குழு முன்னிலையில் ஆஜராகுமாறு முன்னாள் ஜனாதிபதி கோட்டாபய ராஜபக்ஷ அவர்களுக்கும் முன்னதாக அறிவிக்கப்பட்டிருந்தது. இருப்பினும், தான் ஏற்கனவே திட்டமிட்டபடி சிங்கப்பூருக்குப் பயணம் செய்யவுள்ளதால், அதற்கு வேறு ஒரு திகதியை வழங்குமாறு கோரி முன்னாள் ஜனாதிபதி கடந்த 13ஆம் திகதி ஆணைக்குழுவுக்கு எழுத்துப்பூர்வமாக அறிவித்துள்ளார். அதன்படி, இந்த விசாரணை தொடர்பில் கோட்டாபய ராஜபக்ஷ அவர்களிடம் வாக்குமூலம் பதிவு செய்வதற்காக ஆணைக்குழு எதிர்காலத்தில் வேறு ஒரு திகதியை வழங்கவுள்ளது.