கொழும்பு ரோயல் கல்லூரியில் கல்வி கற்கும் பதினைந்து வயது பாடசாலை மாணவர் ஒருவர், அந்தக் கல்லூரியின் மூன்று மாடி கட்டிடத்திலிருந்து கீழே விழுந்து பலத்த காயங்களுடன் வைத்தியசாலையில் அனுமதிக்கப்பட்டுள்ளதாக குருந்துவத்தை பொலிஸார் தெரிவித்தனர். இந்த துரதிர்ஷ்டவசமான சம்பவத்திற்கு முகங்கொடுத்தவர் ஹோகந்தர பிரதேசத்தைச் சேர்ந்த ஒரு குழந்தை.
பொலிஸ் விசாரணைகள் மூலம் வெளிப்படுத்தப்பட்ட தகவல்களின்படி, இந்த விபத்து நேற்று (11) காலை 07.15 மணியளவில் இடம்பெற்றுள்ளது. புனித தோமஸ் கல்லூரிக்கும் ரோயல் கல்லூரிக்கும் இடையில் இன்று நடைபெறவிருந்த வருடாந்த கிரிக்கெட் மகா போட்டிக்கு இணையாக ஏற்பாடு செய்யப்பட்டிருந்த வாகனப் பேரணியில் கலந்துகொள்வதற்காக ஏனைய மாணவர்கள் வெளியே சென்றிருந்த காரணத்தினால், அந்த நேரத்தில் மேல் மாடியில் இருந்த சம்பந்தப்பட்ட வகுப்பறை மூடப்பட்டிருந்தது.
மூடப்பட்டிருந்த வகுப்பறைக்குள் ஜன்னல் வழியாக நுழைய அந்த மாணவன் முயற்சித்துள்ளார். தனது பாடசாலைப் பையையும் தோளில் சுமந்துகொண்டு இவ்வாறு கட்டிடத்திற்குள் நுழைய முயன்றபோது திடீரென கால் தவறி கீழே விழுந்ததாக பொலிஸார் தெரிவித்தனர். மேலும், கட்டிடத்தின் மேல் மாடிக்கு அருகில் இருந்த ஒரு மரக்கிளையும் உடைந்து மாணவனுடன் கீழே விழுந்ததும் விசாரணைகளில் உறுதி செய்யப்பட்டுள்ளது.
விபத்தில் பலத்த காயமடைந்த மாணவன் உடனடியாக கொழும்பு தேசிய வைத்தியசாலைக்கு கொண்டு செல்லப்பட்டுள்ளார். அவர் தற்போது வைத்தியசாலையின் தீவிர சிகிச்சை பிரிவில் மேலதிக சிகிச்சை பெற்று வருவதாக தகவல்கள் தெரிவிக்கின்றன. இந்த சம்பவம் தொடர்பில் கல்லூரியின் அதிபர், ஆசிரியர்கள் மற்றும் மேலும் சில மாணவர்களிடம் வாக்குமூலங்கள் பதிவு செய்யப்பட்டுள்ளதாக ஒரு சிரேஷ்ட பொலிஸ் அதிகாரி தெரிவித்தார். அத்துடன், குற்றவியல் தடயவியல் ஆய்வக அதிகாரிகளும் பாடசாலைக்கு வந்து சம்பந்தப்பட்ட இடத்தை மேலதிக பரிசோதனைக்கு உட்படுத்தியுள்ளனர்.