இரத்மலான தொழினுட்ப பல்கலைக்கழகத்தில் கல்வி கற்கும் இரண்டு மாணவர்களை கூரிய ஆயுதத்தால் தாக்கி காயப்படுத்திய அதே பல்கலைக்கழக மாணவனைக் கைது செய்ய கல்கிசை தலைமையகப் பொலிஸார் விரிவான விசாரணையை ஆரம்பித்துள்ளனர். இந்த கத்திக்குத்து சம்பவத்தில் காயமடைந்த ஒரு மாணவர் கொத்தலாவல வைத்தியசாலையில் சிகிச்சை பெற்ற பின்னர் கடந்த 16ஆம் திகதி கல்கிசை பொலிஸ் குற்றப் புலனாய்வுப் பிரிவுக்குச் சென்று இது தொடர்பில் உத்தியோகபூர்வமாக முறைப்பாடு செய்துள்ளார்.
தாக்குதலில் காயமடைந்த மற்றைய மாணவர் தற்போது கொழும்பு தேசிய வைத்தியசாலையில் அனுமதிக்கப்பட்டு மேலதிக சிகிச்சை பெற்று வருகிறார்.பொலிஸ் விசாரணைகளில் தெரியவந்துள்ளபடி, இந்த மோதல் கடந்த 15ஆம் திகதி இரவு இடம்பெற்றுள்ளது. அன்று பல்கலைக்கழக மாணவர்கள் மற்றும் ஊழியர்களுக்கிடையில் நடைபெற்ற கரப்பந்தாட்டப் போட்டிக்குப் பின்னர் இரவு நேரத்தில் ஒரு இசை நிகழ்ச்சியும் ஏற்பாடு செய்யப்பட்டிருந்தது. நள்ளிரவு வேளையில் இந்த இசை நிகழ்ச்சியின் போது ஏதோ ஒரு காரணத்திற்காக மாணவர்களுக்கிடையில் வாக்குவாதம் ஏற்பட்டுள்ளது. அந்த சண்டை முற்றிய பின்னர், சந்தேகநபரான மாணவன் மற்ற இரண்டு மாணவர்களையும் கத்தியால் குத்தி காயப்படுத்திவிட்டு அங்கிருந்து தப்பிச் சென்றுள்ளதாக பொலிஸார் தெரிவித்தனர்.
இவ்வாறு குற்றத்தைச் செய்துவிட்டு பிரதேசத்திலிருந்து தப்பிச் சென்ற சந்தேகநபரான மாணவன் தங்காலை, பெலியத்த பிரதேசத்தைச் சேர்ந்தவர் என தற்போது தகவல் வெளியாகியுள்ளது. மேல் மாகாண தெற்குப் பொறுப்பதிகாரி பிரதிப் பொலிஸ் மா அதிபர் சமந்த விஜேசேகரவின் அறிவுறுத்தலின் பேரிலும், கல்கிசை பிரிவின் சிரேஷ்ட பொலிஸ் அத்தியட்சகர் அசோக குணசேகரவின் வழிகாட்டலின் கீழும், கல்கிசை தலைமையகப் பொலிஸ் குற்றப் புலனாய்வுப் பிரிவின் அதிகாரிகள் குழுவினர் தப்பிச் சென்ற சந்தேகநபரை கைது செய்வதற்கான மேலதிக விசாரணைகளை மேற்கொண்டு வருகின்றனர்.
