வடக்கு களுத்துறை பிரதேசத்தில் வாடகை வீட்டில் தற்காலிகமாக தங்கியிருந்த பங்களாதேஷ் பிரஜைக்கு சொந்தமான பதினைந்து இலட்சம் ரூபாய்க்கும் அதிகமான பெறுமதியுடைய உள்நாட்டு மற்றும் வெளிநாட்டு பணத்தொகை திருடப்பட்ட சம்பவம் தொடர்பில் வடக்கு களுத்துறை பொலிஸார் விரிவான விசாரணைகளை ஆரம்பித்துள்ளனர். இவருடன் குறித்த வீட்டில் தங்கியிருந்த மற்றொரு வெளிநாட்டவரும் அவரது இரண்டு வெளிநாட்டு தோழிகளும் இந்தப் பணத்தைத் திருடி தப்பிச் சென்றுள்ளதாக பொலிஸாருக்கு தகவல் கிடைத்துள்ளது.
இவ்வாறு பணத்தை இழந்தவர் கமல் ஹொசைன் டிடார் என்ற பங்களாதேஷ் பிரஜை ஆவார். வடக்கு களுத்துறை பொலிஸில் அவர் அளித்த முறைப்பாட்டின்படி, திருடப்பட்ட மொத்த பணத்தின் மதிப்பு ரூபா 1,564,487 ஆகும். இதில் இலங்கை ரூபா 13,000 மற்றும் அமெரிக்க டொலர் 4,900 என்பன அடங்குவதாக முறைப்பாட்டாளர் மேலும் குறிப்பிட்டுள்ளார்.
முறைப்பாட்டாளர் தனது வணிக நடவடிக்கைகளுக்காக கடந்த 06 ஆம் திகதி தனது வெளிநாட்டு நண்பருடன் இலங்கை வந்துள்ளார். அவர்கள் இங்கு வந்த மூன்று நாட்களுக்குப் பிறகு, சந்தேகத்திற்குரிய நண்பரின் இரண்டு வெளிநாட்டு தோழிகளும் தீவுக்கு வந்துள்ளனர். பின்னர், 13 ஆம் திகதி முதல் இந்த நால்வரும் வடக்கு களுத்துறை, கெமுனு மாவத்தை பிரதேசத்தில் உள்ள ஒரு வீட்டை வாடகைக்கு எடுத்து ஒன்றாக வசித்து வந்துள்ளனர்.
எவ்வாறாயினும், கடந்த 18 ஆம் திகதி பகல் முறைப்பாட்டாளர் தூக்கத்திலிருந்து எழுந்து பார்த்தபோது, குறித்த வெளிநாட்டு நண்பரும் அவரது இரண்டு தோழிகளும் வீட்டில் இருக்கவில்லை. அவர்களது தனிப்பட்ட பயணப் பைகள் உட்பட அனைத்து பொருட்களும் வீட்டிலிருந்து எடுத்துச் செல்லப்பட்டிருந்ததாகவும், தனது வசம் இருந்த பணத்தொகையும் அவர்களால் எடுத்துச் செல்லப்பட்டதாகவும் அவர் பொலிஸாருக்கு அளித்த வாக்குமூலத்தில் மேலும் குறிப்பிட்டுள்ளார்.
