விளக்கமறியலில் வைக்கப்பட்டுள்ள முன்னாள் அமைச்சர் ஜோன்ஸ்டன் பெர்னாண்டோவின் நலன் விசாரிப்பதற்காக பாராளுமன்ற உறுப்பினர் நாமல் ராஜபக்ஷ இன்று மஹர சிறைச்சாலைக்குச் சென்றுள்ளார். அந்தச் சந்தர்ப்பத்தின் பின்னர் ஊடகங்களுக்குக் கருத்துத் தெரிவித்த நாமல் ராஜபக்ஷ, சுமார் இரண்டரை இலட்சம் ரூபா பெறுமதியான பொருட்களைத் திருடியதாகக் கூறப்படும் சம்பவம் தொடர்பில் அரசாங்கம் இதுவரை பதினைந்து இலட்சம் ரூபாவுக்கு மேல் செலவிட்டுள்ளதாகத் தெரிவித்தார்.
மேலும், இது அரசாங்கத்தால் நஷ்டத்துடன் மேற்கொள்ளப்படும் வெறும் அரசியல் பழிவாங்கல் மட்டுமே என்றும் அவர் அங்கு வலியுறுத்தினார்.முன்னாள் கூட்டுறவு மற்றும் உள்நாட்டு வர்த்தக அமைச்சருக்கு எதிராக முன்வைக்கப்பட்டுள்ள பிரதான குற்றச்சாட்டு என்னவென்றால், லங்கா சதொச நிறுவனத்திற்குச் சொந்தமான லொறிகள் மற்றும் சாரதிகளையும் பயன்படுத்தி அரசாங்கத்தின் பணத்தையும் சொத்துக்களையும் குற்றவியல் ரீதியாக தவறாகப் பயன்படுத்தியமை ஆகும். சதொச லொறியை இவ்வாறு துஷ்பிரயோகம் செய்தமை தொடர்பில் நிதி மோசடி விசாரணைப் பிரிவினால் மேற்கொள்ளப்பட்ட விசாரணையின் அடிப்படையில் கைதுகள் இடம்பெற்றுள்ளன. அதன்படி, ஜோன்ஸ்டன் பெர்னாண்டோவுடன், ஜோஹான் பெர்னாண்டோ, ஜெரம் பெர்னாண்டோ மற்றும் சதொச நிறுவனத்தின் முன்னாள் போக்குவரத்து முகாமையாளர் ஒருவரும் மீண்டும் விளக்கமறியலில் வைக்கப்பட்டுள்ளனர்.
இது தவிர, இலஞ்சம் அல்லது ஊழல் குற்றச்சாட்டுகள் விசாரணை ஆணைக்குழுவும் ஜோன்ஸ்டனுக்கு எதிராக ஒரு தனி வழக்கை தாக்கல் செய்துள்ளது. அதில், 2010 ஆம் ஆண்டு முதல் 2014 ஆம் ஆண்டு வரையான காலப்பகுதியில் வர்த்தக அமைச்சராகப் பதவி வகித்தபோது சதொச ஊழியர்களை அவர்களின் சட்டபூர்வமான கடமைகளில் இருந்து நீக்கி அரசியல் நடவடிக்கைகளுக்குப் பயன்படுத்தியதன் மூலம் அரசாங்கத்திற்கு நிதி இழப்பை ஏற்படுத்தியதாகக் குற்றம் சாட்டப்பட்டுள்ளது.