மகரகம, பமுனுவ பிரதேசத்தில் அமைந்துள்ள இருமாடி வீடொன்றின் மேல் மாடிக்கு அடையாளம் தெரியாத நபர்கள் தீ வைத்த சம்பவத்தில் தாயும் அவரது இளம் மகளும் உயிரிழந்துள்ளனர். இந்தச் சம்பவத்தில் மேலும் இரு ஆண்கள் பலத்த தீக்காயங்களுடன் பாதிக்கப்பட்டுள்ளதாக பொலிஸார் உறுதிப்படுத்தியுள்ளனர்.
இவ்வாறு துரதிர்ஷ்டவசமாக உயிரிழந்தவர்கள் குறித்த பிரதேசத்தில் வாடகை வீட்டில் வசித்து வந்த 55 வயதுடைய பெண்ணும் அவரது 16 வயதுடைய மகளுமாவர்.
தீ விபத்தில் சிக்கி சிறுமியின் தந்தையும், வீட்டின் உரிமையாளரான 76 வயதுடைய நபரும் பலத்த தீக்காயங்களுக்கு உள்ளாகியுள்ள நிலையில், அவர்கள் தற்போது வைத்தியசாலையில் சிகிச்சை பெற்று வருகின்றனர்.
இந்த துயரச் சம்பவம் கடந்த வெள்ளிக்கிழமை (18) பதிவாகியுள்ளது. வீடு தீப்பிடித்தபோது உடனடியாக செயற்பட்ட பிரதேசவாசிகள் ஒன்றிணைந்து தீயை அணைக்க நடவடிக்கை எடுத்ததுடன், காயமடைந்தவர்களை வைத்தியசாலைக்கு கொண்டு செல்லவும் நடவடிக்கை எடுத்துள்ளனர். உயிரிழந்த தாயினதும் மகளினதும் சடலங்கள் பின்னர் வீட்டின் அறையொன்றில் இருந்து மீட்கப்பட்டுள்ளன.
குற்றம் நடந்த இடத்தில் பெற்றோல் வாசனை இருந்ததாக பொலிஸார் தெரிவித்துள்ளனர். இது வெறும் தீ விபத்து மட்டுமல்ல, இரட்டைக் கொலைகளைச் செய்யும் நோக்குடன் திட்டமிட்டு மேற்கொள்ளப்பட்ட தீ வைப்புச் சம்பவம் என ஆரம்பகட்ட விசாரணைகளில் சந்தேகிக்கப்படுகிறது.
இந்த கொடூரமான குற்றத்திற்கான சரியான காரணம் அல்லது நோக்கம் இதுவரை கண்டறியப்படவில்லை. சந்தேகநபர்களை சட்டத்தின் முன் நிறுத்துவதற்காக மகரகம பொலிஸார் விரிவான விசாரணைகளை ஆரம்பித்துள்ளனர்.