களுத்துறை தெற்கு, வெட்டுமக்கடை பள்ளிவாசல் வீதிப் பிரதேசத்தில் இன்று (28) காலை இடம்பெற்ற ஆயுதத் தாக்குதலில் அப்பிரதேசத்தின் பிரபல வர்த்தகர் ஒருவர் உயிரிழந்துள்ளார். காலை 8.59 மணியளவில் இந்தச் சம்பவம் இடம்பெற்றுள்ளதுடன், துப்பாக்கிச் சூட்டில் படுகாயமடைந்தவர் களுத்துறை நாகொடை வைத்தியசாலையில் அனுமதிக்கப்பட்ட போதிலும், அவர் ஏற்கனவே உயிரிழந்திருந்ததாக பொலிஸார் உறுதிப்படுத்தினர்.
களுத்துறை தெற்கு, மரிக்கார் வீதியைச் சேர்ந்த 38 வயதுடைய பக்கீர் மொஹமட் மொஹமட் ஷபிக் என்பவரே இவ்வாறு கொல்லப்பட்டுள்ளார். மாட்டு இறைச்சி விற்பனை செய்யும் வியாபாரத்தில் ஈடுபட்டு வந்த இவர், ஹஜ் பெருநாளை முன்னிட்டு இஸ்லாமிய பள்ளிவாசலுக்குச் சென்று தனது ஸ்கூட்டர் ரக மோட்டார் சைக்கிளில் வீடு திரும்பிக் கொண்டிருந்த போதே இந்த சந்தேகத்திற்கிடமான தாக்குதலுக்கு உள்ளாகியுள்ளார்.
வீதியோரத்தில் நிறுத்தப்பட்டிருந்த சாம்பல் நிற கார் ஒன்றிலிருந்து திடீரென வந்த கொலையாளிகள், மோட்டார் சைக்கிளின் பாதையை மறித்து, பின்னர் காருக்குள்ளிருந்தவாறே T56 ரக துப்பாக்கியால் பாதிக்கப்பட்டவர் மீது நான்கு தடவைகள் துப்பாக்கிச் சூடு நடத்தியுள்ளனர். இந்த முழுச் சம்பவமும் அருகிலிருந்த சிசிடிவி கமராக்களில் தெளிவாகப் பதிவாகியுள்ளதுடன், அந்தக் காட்சிகள் தற்போது ஊடகங்களுக்கும் வெளியிடப்பட்டுள்ளன.
குற்றத்தைச் சதி செய்து நிறைவேற்ற சந்தேகநபர்கள் இரண்டு வாகனங்களைப் பயன்படுத்தியுள்ளதாக பொலிஸ் விசாரணைகளில் தெரியவந்துள்ளது. அவர்கள் முதலில் வெள்ளை நிற வேன் ஒன்றில் வந்து பின்னர் துப்பாக்கிச் சூடு நடத்துவதற்காக கார் ஒன்றுக்கு மாறியுள்ளனர். கொலையின் பின்னர் தப்பிச் செல்லப் பயன்படுத்தப்பட்ட கார் தெபுவன, நாபடை தபால் அலுவலகத்திற்கு அருகில் கைவிடப்பட்ட நிலையில் பொலிஸாரால் கண்டுபிடிக்கப்பட்டதுடன், சந்தேகநபர்கள் முதலில் வந்ததாகக் கூறப்படும் வெள்ளை நிற வேன் நண்பகலில் தொட்டங்கொட பிரதேசத்தில் கைவிடப்பட்ட நிலையில் விசாரணை அதிகாரிகளால் கண்டுபிடிக்கப்பட்டது.
இந்தக் கொலை தனிப்பட்ட தகராறு, கள்ளத்தொடர்பின் விளைவு அல்லது பொலிஸாருக்கு தகவல் வழங்கிய சம்பவம் காரணமாக நடந்திருக்கலாம் என ஆரம்பகட்ட விசாரணைகளில் பொலிஸார் சந்தேகிக்கின்றனர். இந்தக் குற்றம் தொடர்பில் களுத்துறை சிரேஷ்ட பொலிஸ் அத்தியட்சகரின் மேற்பார்வையின் கீழ் மூன்று விசேட பொலிஸ் குழுக்கள் ஈடுபடுத்தப்பட்டு சந்தேகநபர்களைக் கைது செய்வதற்கான விரிவான நடவடிக்கை ஏற்கனவே ஆரம்பிக்கப்பட்டுள்ளதாக பொலிஸ் ஊடகப் பேச்சாளரும் உதவிப் பொலிஸ் அத்தியட்சகருமான எஃப். யூ. வூட்லர் தெரிவித்தார்.