இலங்கைக்கு வடகிழக்கே வங்காள விரிகுடாவை அண்மித்து உருவாகியுள்ள குறைந்த அழுத்தப் பிரதேசம் தொடர்ந்து செயலில் உள்ளதால், நாடு முழுவதும் நிலவும் மழைக்கால வானிலை அடுத்த சில நாட்களுக்கு மாறாமல் இருக்கும் என எதிர்பார்க்கப்படுகிறது. இன்று (13) காலை ஊடகவியலாளர் சந்திப்பொன்றை நடத்திய வானிலை ஆய்வுத் திணைக்களத்தின் பணிப்பாளர் நாயகம் அதுல கருணாநாயக்க, இந்த அமைப்பின் தாக்கம் காரணமாக அடுத்த நாட்களில் மழை நிலைமை மேலும் அதிகரிக்கக்கூடும் என்று தெரிவித்தார்.
அத்துடன், எதிர்வரும் மே மாதம் 24, 25 மற்றும் 26 ஆம் திகதிகளில் இலங்கையை பாதிக்கும் தென்மேற்கு பருவமழை காலநிலை ஆரம்பமாகவுள்ளது என்றும் அத்திணைக்களம் மேலும் சுட்டிக்காட்டுகிறது.தற்போதைய நிலைமையைக் கருத்தில் கொண்டு, மேல், சப்ரகமுவ, மத்திய மற்றும் வடமேல் மாகாணங்களுக்கும், காலி மற்றும் மாத்தறை மாவட்டங்களுக்கும் பொருந்தக்கூடிய வகையில் வானிலை ஆய்வுத் திணைக்களம் சிவப்பு எச்சரிக்கையை வெளியிட்டுள்ளதுடன், அந்தப் பிரதேசங்களின் சில இடங்களில் 150 மில்லிமீட்டருக்கும் அதிகமான மிகக் கனமழை பெய்யக்கூடும். அத்துடன், ஊவா மாகாணத்திலும் அத்துடன் அம்பாறை மற்றும் மட்டக்களப்பு மாவட்டங்களின் சில இடங்களிலும் 100 மில்லிமீட்டருக்கும் அதிகமான கனமழை பெய்யக்கூடும் என்றும், நாட்டின் ஏனைய பிரதேசங்களில் பிற்பகல் 1.00 மணிக்குப் பின்னர் இடியுடன் கூடிய மழை அதிகரிக்கும் என்றும் காலநிலை முன்னறிவிப்புகள் தெரிவிக்கின்றன. இடியுடன் கூடிய மழையுடன் ஏற்படக்கூடிய தற்காலிக பலத்த காற்று மற்றும் மின்னல் ஆபத்துக்களைக் குறைப்பதற்கு மக்கள் விரைவான நடவடிக்கைகளை எடுக்க வேண்டும் என்று அதிகாரிகள் வலியுறுத்துகின்றனர்.
தொடர்ச்சியாக பெய்து வரும் மழை காரணமாக பல மாவட்டங்களில் மண்சரிவு முன் எச்சரிக்கைகள் புதுப்பிக்கப்பட்டுள்ளன. தேசிய கட்டிட ஆராய்ச்சி அமைப்பினால் வெளியிடப்பட்ட அறிக்கைகளின்படி, பதுளை மாவட்டத்தின் பஸ்ஸர பிரதேசத்திற்கு இரண்டாம் நிலை அம்பர் நிற மண்சரிவு முன் எச்சரிக்கை விடுக்கப்பட்டுள்ளதுடன், மக்கள் இது குறித்து மிகுந்த அவதானத்துடன் இருக்க வேண்டும்.
மேலும், களுத்துறை, கண்டி, கேகாலை, குருநாகல், மாத்தளை, மொனராகலை மற்றும் இரத்தினபுரி மாவட்டங்களின் பல பிரதேச செயலாளர் பிரிவுகளுக்கு முதலாம் நிலை மஞ்சள் நிற அவதான அறிவிப்புகள் வெளியிடப்பட்டுள்ளன. பதுளை, வலல்லாவிட்ட, பாத்தஹேவாஹெட்ட, பஸ்பாகேகோரலே, அக்குரணை, கங்கவட்டகோரலே, பன்வில, யடிநுவர, கங்கைஹலகோரலே, தொலுவ, உடபலாத்த, மாவனெல்ல, புலத்கொஹுபிட்டிய, யட்டியாந்தோட்டை, அரநாயக்க, கேகாலை, ரம்புக்கனை, ரிதிகம, நாவுல, அம்பன்கங்ககோரலே, ரத்தோட்டை, படல்கும்புர, வெல்லவாய, கொடகவெல, இரத்தினபுரி மற்றும் கலவான ஆகிய பிரதேசங்கள் இவ்வாறு ஆபத்துக்குள்ளாகக்கூடிய பகுதிகளாக அடையாளம் காணப்பட்டுள்ளன. தற்போதைய மழைவீழ்ச்சியுடன் மண்சரிவுகள் அல்லது மண்மேடுகள் சரிந்து விழும் அறிகுறிகள் குறித்து அவதானத்துடன் இருக்குமாறு சம்பந்தப்பட்ட பிரதேச மக்களைக் கேட்டுக்கொள்ளப்படுகிறது.