அம்பலாந்தோட்டை பிரதேசத்தில் முன்னர் இடம்பெற்ற மும்மடங்கு கொலைச் சம்பவம் தொடர்பில் பிரதான சந்தேகநபராக பெயரிடப்பட்டு நீதிமன்றத்தால் பிணையில் விடுவிக்கப்பட்டிருந்த ஒருவர் மிகவும் கொடூரமான முறையில் கொலை செய்யப்பட்ட சம்பவம் ஒன்று பதிவாகியுள்ளது. கடந்த மே மாதம் 11ஆம் திகதி இரவு இந்த கொலை இடம்பெற்றுள்ளதுடன், கொலை செய்யப்பட்டவரின் தலைப்பகுதி உடலிலிருந்து துண்டிக்கப்பட்டு மாமடல சந்தியில் அமைந்துள்ள ரத்னாவலி தேவியின் சிலை அருகே வைக்கப்பட்டிருந்த நிலையில் பொலிஸாரால் கண்டுபிடிக்கப்பட்டுள்ளது.
இந்த கொடூரமான குற்றம் தொடர்பில் சந்தேகத்தின் பேரில் ஒருவர் நேற்று (12) அம்பலாந்தோட்டை பொலிஸாரால் கைது செய்யப்பட்டுள்ளார்.இவ்வாறு கொலை செய்யப்பட்டவர் அம்பலாந்தோட்டை மாமடல யாய 11 பிரதேசத்தைச் சேர்ந்த வீரசேகர ஆரச்சிகே லக்மால் சந்தருவன் அல்லது 'பொடி' என அழைக்கப்படும் 39 வயதுடைய திருமணமான ஒருவராவார். கடந்த திங்கட்கிழமை இரவு இவர் தனது வீட்டில் தங்கியிருந்தபோது, துப்பாக்கிகள் மற்றும் வெட்டுக்கத்திகளுடன் ஆயுதம் ஏந்திய மூவர் கொண்ட குழுவொன்று வீட்டிற்குள் புகுந்து இந்த தாக்குதலை நடத்தியுள்ளது. இதன்போது சந்தருவன் என்பவரை சுட்டு, வெட்டுக்கத்திகளால் வெட்டி தலையை துண்டித்துள்ளனர். சம்பவத்தில் பலத்த காயமடைந்த அவரது மாமனார் அதாவது மனைவியின் தந்தையும் வைத்தியசாலையில் அனுமதிக்கப்பட்டுள்ளார்.
தாக்குதலில் பலத்த காயமடைந்த லக்மால் சந்தருவன் காலி தேசிய வைத்தியசாலையில் அனுமதிக்கப்பட்ட பின்னர் உயிரிழந்துள்ளதாக பொலிஸார் உறுதிப்படுத்தியுள்ளனர். சந்தேகநபர்கள் எடுத்துச் சென்ற அவரது தலைப்பகுதி வீட்டிலிருந்து சுமார் நூறு மீட்டர் தூரத்தில் உள்ள சந்தியில் உள்ள சிலை அருகே வைக்கப்பட்டு தப்பிச் சென்றது விசாரணைகளில் தெரியவந்துள்ளது. இந்த சம்பவத்துடன் தொடர்புடைய மேலும் இருவரை கைது செய்வதற்காக உயர் பொலிஸ் அதிகாரிகளின் வழிகாட்டலின் கீழ் அம்பலாந்தோட்டை பொலிஸார் தற்போது விசேட நடவடிக்கையை ஆரம்பித்துள்ளனர்.
உயிரிழந்த லக்மால் சந்தருவன் என்பவர் 2025ஆம் ஆண்டு பெப்ரவரி மாதம் 02ஆம் திகதி அம்பலாந்தோட்டை மாமடல கிழக்கு பவினியன்வல பிரதேசத்தில் மூவரை கொலை செய்த சம்பவத்துடன் நேரடியாக தொடர்புடையவர் என குற்றம் சாட்டப்பட்டவர். எச்.ஏ.பி. இந்திக்க (29), எம்.டபிள்யூ. மல்லவஆரச்சி (34) மற்றும் எச். கே.ஆர். பிரியதர்ஷன (45) ஆகிய மூவரும் அங்கு கொலை செய்யப்பட்டிருந்தனர். அந்த கொலை சம்பவத்திற்கு பழிவாங்கும் நடவடிக்கையாகவே இந்த புதிய கொலை இடம்பெற்றிருக்கலாம் என பொலிஸார் சந்தேகிக்கின்றனர்.
